پرسەی پڕ لە دووسەیل هادی غوڵام لە خانەقین

کەنعان موڕاد 

لە کەندا، وڵاتیگ فرە دویر،  تافەی ئاو ئەڵوەن لە زریکەی ئەسارەیل پەیا کردیاد، و هەر وەختیگ ئەسارەیل لەیەو دیار نەوین، زانستیاد، کە ئەڵوەن لیخنەو بویە.

لە ساڵ 1951، هادی غوڵام، لە گەڕەک مەزرەعە، لە ساڵ خانەقین لەداڵگبویە، و هەر لەو شارە مناڵیی وەسەر برد، و پڕ جام ویژدانی لە کەلتوور و دەڵپاکی مەردم کرد، تا دویاترین رووژی، وەگەرد لەرزین دەسی لەوەر بیماری، نەهیشت ئەو جامە بڕشێد.

هادی غوڵام، هەر لە خانەقین خوەنەواری تەواو کرد، وەگەرد ئەوەیش وەرزشوان ناودیاریگ بوی، لە ئاست پارێزگای دیالە و عراقیش.

هادی غوڵام چگە ئەکادیمیای هونەرە جوانەیل لە بەغداد، و لەورا کەفتە کار شانۆگەری، کە بویە ئەندام تیپ شانۆگەری تاڤگە.

له سال 1974 یەکیگ بوی لەو کەسەیل سەرەکیە لە هەڵقەیل رووشنهویری که (شەهید شیهاب) پیشنیازی کردوێد، که بيجگه له هادی غوڵام (عيماد ئەحمەد حکمەت محمد کەریم، و عەلى شامار وفازڵ کەريم و نەريمان مەحمود) بوین. 

 هادی بەشداری لە  شووڕش ئەیلوول کرد و له راگەیانن دەرهێنەر بوی له راديۆ له ناوچەی مەحمود قەجەر سەروە خانقین، دویای شکشت شووڕش، هادی غوڵام ئاوارەی ئيران بوی و تا ماوەیگ له ئۆردوگای ئەنزل مەن، ئمجا له تۆردوگای سەراب نیلوفەر لەورەو وەگەرد هاوريلی پەیوەندی وە مەردم و هاوڕیەیل رێکخستن وەردەوام بوی.

هادی غوڵام  دویای ئەوە خوەی رەسانە رووسیا، ئمجا لەورەو رەسیە کەنەدا، تا لە کەنەدا جیگیر بوی. 

دویای ئەو ساڵەیلە، لە ئاوارەبوین وڵاتەیل، و رەنج و تەقەلا وەگەرد خوەی و خیزانی، و فتراق پرس کورد، و باوەتەیل راگەیانن و و هونەر، لە ساڵ 2013 دووارە ئەرا شار خانەقین گلەو خوارد، و بویە وەرپرس ماڵ رووشنهویری شەهید سەلام، و لەورا رەنج و تەقەلای گەورەیگ دا ئەرا بەرزکردن کار رووشنهویری و ئەدەبی و هونەری، و وەگەرد بڕیگ لە رووشنهویرەیل شارەگە (ساڵون سێشەممە) دروس کرد، و هەفتانە چالاکییەیلیگ جویراجویر پیشکەش کرد، وەلێ لە دویای ساڵ 2015 جاریگ ترەک ئەرا کەنەدا گلەو خوارد، و هەر ماوەی جاریگ سەردان خانەقین کردیاد، یەکیگیان لە ئاهەنگ وازکردن چایخانەی کەلتووری عەبدولمەجید لوتفی لە ساڵ 2017، کە وتاریگ پیشکەش کرد، و دویاترین دیداری لە خانەقین لە ساڵ 2023 کە لە چایخانەی میلکان کۆڕیگ پێشکەش کرد.

لە کەندا، واز لە تەقەلای رەسانن پەیام رووشنهویریی و ئاشکراکردن نووڕینەیل خوەی نەهاورد، کە دەسکرد وە بڵاوکردن پارچە ڤیدیۆ تا لەناوی ئەو پەیامەیلە بویشێد، وەلێ دویای توومارکردن یەکەم پارچە ڤیدیۆ، تەندروسیی دەسمیەتی نەیا تا دووارە خوەی بەێدە گەز.

هادی غوڵام لە رووژ 27/6/2025، دویای زیان دویرودرویژیگ وەگەرد بیماری، لە کەنەدا دویاکووچی کرد.

هەرچەن مەردم فرەیگ داوای گلەوداین تەرمەگەی رەحمەتی هادی غوڵام ئەرا شارەگەی خوەی کردن، هەرچەن تەقەلا ئەرا ئەوەیش دریا، وەلێ ئەو کارە ڕێک نەهات.

دووسەیل هادی غوڵام، پرسەیگ گەورە ئەرا یادکردن گیانی پاکی لە شار خانەقین نان، ئەو پرسە کە نە تەرم خاوەنی نەیش هووز و خیزان و کوڕ و نەوە و بنەماڵەی لەناوی بوین، نشان دا کە هادی غوڵام کەسیگ بوی توەنست شوین خوەی لەناو دڵ مەردم تا هەمیشە بکەێدەو.