تووڕەیل کۆمەڵایەتی لە خانەقین… گۆڕەپانیگ لە ژاوەژاو و مەرافە و پرۆپاگەندە
فاتمە سەڵاح ئەرکەوازی/ لە گشت دونیا میدیا هووکاریگە ئەرا زانیاری و پیشکەفتن و رووشنهویریکردن، بەڵام لای ئیمە ئەوەگ تێبینی کرێد بویەسە مدوو وەرەو دویاچگن و ژاوەژاوە و وتید و وتم و گۆڕەپان مەرافەیل و هەڵڕشانن رق و قین دڵیان.
میدیا لای ئیمە بویەسە مدوویگ ئەرا بازیکردن وە هەستەیل مەردم و دروسکردن دڵڕەواکێ و وردەوردەیل ناو مەردم، و دەسەژیەکردن ژیان خێزانەیل و کەلەمدارکردن ناو و ناوبانگ یەکتر، هەڵبەت ئەوەگ ریخوەشکەر سەرەکیە ئەرای تووڕەیل فەیکن.
توڕە کۆمەڵایەتیەل وە ئەندازەی ئەوەگ پیشکەفتن و رووشنهویری لە میدیای جەهانی داشتیە هەمان ئەندازە بەدی ئەرا شار خانقین داشتیە هاتێ زیاتریش بوود!.
شاریگ کە هەر لە زەمانەی دێرین ناو و ناوبانگ رووشنهویربوین و دڵ گەورەیی مەردمەگە دەنگ دابویەو وە گشت شوینیگ، بەڵام ئیرنگە لەسایەی تەکنەلۆژیا جویریگ دویاکەفتن و بیسەروبەری و وەڕەلایی میدیایی هاتیەسەدی.
توڕەیل کۆمەڵایەتی لە خانەقین لەجیای شمارەی رووشنهویرەیل و چالاکی هونەری و زمانەوانی و ئەدەبیەیل و وەرزشی زیایبکەێد، شمارەی قسەزانەیل ناحاڵی و زواندرویژەیل بی گووش و ترسنۆکەیل و موی نەرمەیل زیاوەکردیە، شمارەی ئەو کەسەیلە زیایەوکردیە خوەیان هویچ وە دەسیان نیەتێد و لە ئیرەیی گیانیان توڕەیل وەکارتیارن ئەرا پەلاماردان و ملشکانن و رمانن کەسەیل وە توانا چ لە مژار کار بوود یا رووشنهویر یاخود هەر مژاریگ لە مژارەیل.
وە راسی بەزەییم وە شار خانقین تێد، شاریگ بویچگ باوجی پڕاوپڕ لە رووشنهویری کە رووژەیلیگ ناوبانگ رووشنهویربوین مەردمەگەی لە گشت شارەیل دەنگ ئەیارەو و باس بان زوانەیل بوی ئیرنگە وە مدوو چەن کەسەیلیگ هاتێ ناوبانگی ئاڵشتبوود ئەرا شار "قین"، رووشنهویرەیل و وە توانایەیلیش لە تاو وردەوردەیل و مەرافەیل بان توڕەکۆمەڵایەتی جویر قەقنەس وەبی دەنگی سزیەن، لە شوینیان بوون سزیان بی دەنگیان شارەگە گرێدەو و رەنگ سیای سزیانیان باڵ وەبان خانقین کیشێد.
راسە لە گشت شوینیگ بەش وەخوەی ئێ چشتە روی لە دیاردەبوین کەێد، بەڵام لە هویچ شوینیگ جویر شار خانەقین نەویەسە دیاردە.
