هاری کەین بەرەندەی تووپ تەڵایی بوی

شەفەق نیوز - لەندەن

ئاسارەی ئینگلیزی هاری کەین، پەلاماردەر بایرن میونخ ئەڵمانی، ئمڕوو سێشەممە، خەڵات تووپ تەڵایی ئەرا خاسترین بازیکەر  لە جیهان ئەرا ساڵ ۲0۲6 وەدەسهاورد ئەرا یەکەم جار لە مێژوو وەرزشی خوەی، لە وەخت ریورەسمیگ کە ساز کریا لە لەندەن پایتەخت بریتانیا.

کەین سەرکەفت لە وەرگردن دیارترین خەڵات تاکی لە جیهان، لە دویای وەرزیگ تایبەت وەگەرد بایرن میونخ و هەڵوژاردەی ئینگلیزی، و وەپیشکەفتن لەبان دیارترین رکابەرەیلی، و لە بان گشتیان ئیسپانی لامین یامال، ئاسارەی بەرشەلۆنە، و  کیلیان مبابێ فەڕەنسی، پەلاماردەر ڕیاڵ مەدرید.

وە ئی تاجبەخشینە، کەین کۆتایی  وە نەبوین بازیکەرەیل ئینگلیزی لە بان سەکۆی تووپ تەڵایی ئەرا ماوەی 25 ساڵ هاورد، لە وەختیگ کە هاووڵاتی خوەی مایکل ئۆوین خەڵاتەگە لە ساڵ 2001 بردەو، ئەرا ئەوەگ بوودە پەنجەم بازیکەر ئینگلیزی کە ئی رێزلێنانە وەدەسبارێد.

سەرکەفتن کەین  لە دویای وەرزیگ پڕ لە شمارەیل پەیمانەیی هات، کە لە ناوی 73 گۆڵ توومار کرد وەگەرد یانەگەی و هەڵوژاردەی وڵاتەگەی، و بەشدار بوی لە تاجبەخشین بایرن میونخ وە دوو نازناو خول و جام ناوخوەیی، بیجگە لە درەوشانی لە کۆتاییەیل جام جیهانی 2026.

کەین لە ناو هەمان ریورەسم خەڵات "گەرد موڵەر" ئەرا خاشترین پەلاماردەر وەرگرد، وەرجە ئەوەگ بەرەندەی تووپ تەڵایی بوود، لە شەویگ مێژوویی کە   ریورەسمەگە  لە لۆندۆن ئەرا یەکەم جار سازکریا، هاووەخت وەگەرد یاد 70 ساڵەی دەسوەپیکردن خەڵاتەگە لە ساڵ 1956.