مەسک لە رووژیگ 34 ملیار دۆلار زەرەد وەپی رەسێد
شەفەق نیوز/ میدیایەیل ئەمریکی باس لەوە کەن وە مدوو ناکۆکیەیل ناوەین سەرۆک ئەمریکا دۆناڵد ترامپ و ئیلیۆن مەسک ملیاردێر جەهانی، لە رووژیگ زیاتر لە 34 ملیار دۆلار زەرد وە سامانەگەی مەسک رەسیە.
وەپای میدیایەیل ئەمریکی دویای سەرکەفتن دۆناڵد ترەمپ لە هەڵوژاردن سەرۆکایەتیی ئەمریکا، سامان مەسک رەسیبویە نزیکەی 500 ملیار دۆلار، کە میدیایەیل ئەو ماوەیە وە “رووژەیل تەڵایی مەسک” ناوبردنە.
لە راپۆرتیگ کەناڵ (ئەلعەرەبیە) ئەوە خریاسەروی، دویای تێکچگن پەیوەندیی ناوەین سەرۆک ئەمریکا و ملیاردێرە جیهانییەگە، سامان ئیڵۆن مەسک لە یەک رووژ وە بڕ 34 ملیار دۆلار زەرەد وەپی رەسیە، وە مدوو ڕمیان پشکەیل کۆمپانیای تێسلا.
کەناڵەگە ئاشکرایکردیە، رووژ پەنجشەممەی وەرین ، پشکەیل کۆمپانیای تێسلا (کە ئیڵۆن مەسک خاوەنیەتی)، وە رێژەی 14% داوەزیایە، ئەوەش گەپترین زەرەد کۆمپانیاگە بویە لە ماوەی وەرین.
