فلۆریدا.. پیاییگ ژنەگەی خوەی لە وەرچەو باوانی کوشێد

شەفەق نيوز/ پیاییگ لە ویلایەت فلۆریدای ئەمریکا، وە کوشتن ژنەی وە گولە لەوەر چەو باوگ و دایکی تاوانبار کریا، دویای دەمەقاڵ گەورەیگ.

رووژنامەی نیویۆرک پۆست ئەمریکی وت: دەسەی قەسەمخوەرەیل تەنیا 17 خولەک وەپییان چگ تا شانتيل ئەدكنز وە کوشتن پلەی یەک و چەن توومەتەیل ترەک تاوانبار بکەن.

ئەدکنز تەمەن 37 ساڵە،  شاونتای ژنی 34 ساڵە لەناو ماڵیان لە شار دایتونا لە رووژ 19 ئۆکتۆبەر 2023 کوشتیە.

باوگ و داڵگ ژنەگە ئەو کوشتن دڵتەزنە وەچەو خوەیان دین، کە ژنەگە تەلەفۆنیان کردگە تا پەنا وەپییان بوەێد لە دویای وەردەوەردەیگ لەلایەن شویەگەیەو.

 ئار. جيه. لاريتزا بانگەشەکار گشتی وت: "گەنترین خەفەتە ئەرا هەر باوگ و داڵگیگ دویەتیان لەدەس بیەن، ئەدکنز لە وەرچەو باوگ و داڵگ قوربانیەگە ئەو تاوانە جیوەجی کرد، ئمجا هەڕەشەی کوشتن ئەوانیش دا، یە تاوان کوشتنیگ خیزانیە.

 داڵگ قوربانیەگە وتیە دویەتەی نووڕیەسە پەیامەیلیگ گومانی لەناو مۆبایل شویەگەی، کە دیارە خیانەت کردگە.

دویای ئەوە کە بویەسە دەمەقاڵ و رەسیەسە وەردەوەردەر ژنەگە پەیوەندی وە باوانی کردگە، و هەناێ رەسینە ئەرا ماڵیان، پیاوەگە وە تفەنگ تەقە لە ژنەگە کردگە، و هەر لە شوین خوەی گیانی لەدەسداگە، ئمجا روی تفەنگەگە وەرەو داڵگ و باوگی کردگە، و هەڕەشەی کوشتنیان داگە، ئیجا تەقە لە خوەی کردگە، و شان خوەی زەخمدار بویە.

 باوگ و داڵگ ژنەگە لە ماڵەگە واینە، و باوگە لە دەوکردن گلیاس و پای شکیاس.

بڕیارە فەرمان زیندانیکردن هەمیشەیی وەبان پیاوەگە دەرچوود.