وەزیر دارایی کوردستان: هویچ ریگرییگ لەنوای کلکردن مووچە لە بەغدادەو نییە
2024-05-05T10:39:35+00:00
شەفەق نیوز/ ئاوات شێخ جەناب وەزیر دارایی و ئابووری لە هەرێم کوردستان، ئمڕوو یەکشەممە، راگەیان کە وەزارەتەگەی گشت بابەندیەیلی ئەرا وەزارەت دارایی فیدراڵی جیوەجی کردگە ئەرا کلکردن مووچەی مانگ نیسان گوزەشتە ئەرا فەرمانبەرەیل، وتیش: هویچ ریگرییگ لەنوای هەواڵەکردن مووچەیل نییە.
شێخ جەناب ئەرا بڕیگ لە میدیایل راگەیانن لە هەولێر وت: حکومەت هەرێم کوردستان ئەرک خوەی ئەرا کلکردن مووچەی مانگ نیسان گوزەشتە لە وەزارەت دارایی عراقی جیوەجی کردگە، وتیش؛ دویای تەواوکردن بەشەوکردن مووچەی فەرمانبەرەیل عراق مووچەیل هەرێم کوردستان کل کەن.
وتیش؛ لەلای ئیمەو هویچ ریگرییگ لەنوای کلکردن مووچەی مانگ نیسان ئەرا فەرمانبەرەیل هەرێم کوردستان نییە.
لە وەڵام پرسیاریگ ئایا کەی مووچە رەسێد؟، وەزیر وت: ئی زانیارەیلە هانە لای وەزارەت دارایی عراقی.
