وەزیریگ: حکومەت هەرێم کوردستان لە ئاست عراق و جیهان تەقەلای چارەسەرکردن گیچەڵ مووچەیل دەێد
شەفەق نيوز/ پشتیوان سادق وەزیر ئەوقاف لە هەرێم کوردستان، ئمڕوو جمعە، راگەیان کە حکومەت هەرێم تەقەلایل جدی دەێد لە ئاست ناودەوڵەتی و ناوخوەیی ئەرا چارەسەرکردن گیچەڵ مووچەی فەرمانبەرەیل و کراکارەیل کەرت گشتی لە کوردستان.
سادق دویای نماز جەژن لە هەولێر ئەرا رووژنامەنویسەیل وت: ئیمە فرە نیگەرانیمن لە بڕیار حکومەت فیدراڵی وە بڕین مووچەی فەرمانبەرەیل لە هەرێم کوردستان لە جەژن، وتیش: بیگومان هیچ حکومەتیگ نییە مووچەی هاوڵاتیەیلی لەیجویرە بوونەیگ پیرووز بووڕێد.
دووپاتیش کرد کە حکومەت هەرێم کوردستان پابەندیەیل بان خوەی وەگورەی یاسا و دەستوور جیوەجی کرد.
دیاری کرد کە حکومەت هەرێم کوردستان لە ئاست کۆمەڵگای ناودەوڵەتی و دەوڵەتەیل جیهان و هەمیش لە ئاست بەغداد تەقەلا دەێد ئەرا چارەسەری گیچەڵ مووچەیل، وتیش: هاوڵاتیەیل هەرێم کوردستان کەفتنە وەر غەدر و ستەمیگ گەورە وە بڕیان مووچەیلیان.
هەرایوا، بەشیر حەداد ئیمام نماز جەژن قوربان لە شار هەولێر وە زبری رەخنە لە بڕیار وەزارەت دارایی فیدراڵی گرد، ن ئی بڕیارە خوەشی جەژن لە فرەی ماڵەیل هەرێم کوردستان بڕی، و مناڵەیل لە لەوەرکردن پڕتاڵ نوو بیبەش کرد، هەمیش نەیشت خیزانەیل خوان هەڵڕازنن.
وتیش: بەغداد خوازی وە بوونەی جەژن قوربانی پیشکەش بکەێد، کە مەردم وە خوین قوربانی دەن ئەرا رزگارکردن ژیان ئایەم، یەی بەرژەوەنیەیل گەڵ هەرێم کوردستان و وە مووچەیل هاوڵاتیەبل لات و فەرمانبەر و خانەنشینەیل قوربانی دا، ئەو کارە تاوانیگ یاسایی و دەستووری و مرۆیی ت ڕەوشتیە.
حەداد وتیش: بەشیگ لە وەرپرسەیل ئەرا حەج چگن، وەلێ وەداخەو مووچەیل ملیۆن بڕین، کە وە پ روییگ چنە وەرانوەر خودا، و لە عەرەفات وسیەن و دەس هەڵگرن تا خودا بوەخشێدەیان؟.
