کوشیان وەرپرس راگەیانن نویسینگەی لاهور تاڵەبانی وە رویداویگ هاتوچو لە سلێمانی
2023-08-05T08:14:38+00:00
شەفەق نیوز/ کاروان عەلی شامار وەرپرس نویسینگەی راگەیانن هاوسەرۆک یەکێتی نیشتمان کوردستان، لاهور تاڵەبانی ک وەرجەیە لە حزبەگە دویرەو خریایە، شەوەکی ئمڕوو شەممە، وە رویداویگ هاتوچو لە سلێمانی گیانی لەدەسدا.
کاروان کوڕ عەلی شامارە ک یەکیگ لە پێشمەرگە دێرینەیلە، و کوڕ وەسفیە خانە ک لەناو یەکێتی وە داڵگ شەهیدەیل ناسریاگە.
وەگورەی زانیاری و راپۆرتەیل، رویداوەگە لە ساعەت سێیەی شەفەق ئمڕوو لەناو تونێل بان ری سلێمانی وەرەو کویەی ئەزمەر بویە، هەناێ ماشینەگە لەوەر تونی زیاییگ لەدەسی دەرچگە.
زانیاریەیل ئویشن ماشینەگە مارکەی مارسیدس بویە، و سێ کەس لەناوی بوینە، و لە رویداوەگە کاروان عەلی شامار گیانی لەدەسدا، و دوو کەس زەخمدار بوین.
