کوردستان... کۆڕبەندیگ ئەدەبی لەڕی ئەدەبەو باس کارەساتە میژووییەیل کەێد (وینە و ڤیدیۆ)
شەفەق نیوز/ ئەکادیمیای کوردی کە وە دامەزراوەیگ رووشنهیری و ئەکادیمی لە هەرێم کوردستان دانریەێد، ئمڕوو دووشەممە، کۆڕیگ تایبەت ئەدەبی سازکرد، کە لەناوی باس لە رۆڵ ئەدەب کریا لە نیشاندان ئەو کارەساتە میژووییەیلە کە گەل کورد وە درویژایی سەدەیل تویشی بویە.
حەمە سەعید حەسەن، وەرپرس ئەکادیمیای کوردی ئەرا ئاژانس شەفەق نیوز وت: "ئی کۆڕبەندە لە چوارچیوەیگ هەمەلایەنە لە ئاست هەرێم کوردستان ئەرا بەڵگەنامەکردن ئەو کارەساتەیلە کە گەل کورد تویشیان هاتگە، لەڕی ئەدەب، لەوانە ئەنفال و کارەساتەیل نەتەوەیی ترەک کە کورد وەدرویژایی قۆناغە میژووییە جیاوازەیل تویش بویە".
وتیش: "کۆڕەگە بەشدارییگ فراوان توێژەران و نویسەران وەخوەی دی، و پیشکەشکردن چوار توێژینەوەی زانستی کە رووشنایی خستنە بان شیکەوردن و هەڵسەنگاندن بەرهەمە ئەدەبییەیل، لەوانەیش ڕۆمان و چیرووک و دەق و شیعر، جویر ئامرازیگ هونەری ئەرا نشاندان کارەساتە نەتەوەیی و مرۆییەیل".
حەسەن وتیش: تەقەلا دەیمن ئەدەب بکەیمنە ئامرازیگ کاریگەر ئەرا رەسانن وینەی ئازارەیل کورد وە جیهان. ئەدەب جویر شانۆ و هونەر زوانیگە وەناو کارەسات قسە کەێد و توەنێد ڕاسگویانە و هوشیارانە قویلایی کارەساتەیل مرۆڤ نشان بەێد، وەتایبەتی لە ناو گەلەیل پیشکەفتگ و هوشیار کە نرخدار ئی فۆرم باسکردنە کولتووریە زانن.
وتیش: کۆڕبەندەگە کامیگ پیشکەفتگە ئەرا بەڵگەنامەکردن یادەوەری کوردی وە زوانیگ ئەدەبی کاریگەر، و ئاڵشتکردن ژان ئەرا پەیامیگ هونەری و ئینسانی کە رەسێدە خوەنەوار ناوخۆیی و جیهانی بۆ ئەوەی لە ڕادەی رخداری ئەو کارەساتەیلە بفامن کە گەل کورد وەخوەی دیە.
