هەولێر.. لە چوارچیوەی پڕۆژەی رووشنایی 60 پاڵاوگە بەسیا و 7 هەزار مۆلیدە لاوریا

شەفەق نیوز/ دەسەڵات پاراستن و چاکسازیی ژینگەی هەرێم کوردستان، ئمڕوو چوارشەممە، بەسانن 60 پاڵاوگەی بی مووڵەت لە هەولێر ڕاگەیان، دووپاتیش کرد کە گامەیلیگ کارا جیوەجی کریان ئەرا لاوردن هەزاران مۆلیدەی کارەبایی لە چوارچیوەی پڕۆژەیگ تۆکمەی ژینگەیی ئەرا خاسترکردن کوالیتی وا و پەرەپیدانی سیستەمیگ رووشنایی وەردەوام لە هەرێم.

سینان عەبدوڵڵا، قسەکەر دەسەگە لە کۆنگرەیگ رووژنامەوانی کە پەیامنێر ئاژانس شەفەق نیوز ئامادەی بوی وت: " دەسەگە لە بڕ 138 پاڵاوگەی نەفت لە هەولێر 60 پاڵاوگەی نەفت بەساس، بیجگە لە 13 پاڵاوگەی ترەک لە دهۆک، یەیش لە چوارچیوەی ڕێکارەیل سنووردارکردن پیسبوین و شیوازە ناپارێزراوەیل کارکردن".

وتیش "دەسەگە لە ماوەی ساڵ گوزەشتە، دوو هەزار و 832 مووڵەت ئەرا کارگەیل دەرکردگە، لە وەختیگ 25 مووڵەت رەتکریاس ئەرا ئەو پڕۆژەیلە کە پابەند نەوینە وە ستانداردە ژینگەییەیل"، وتیش: "3018 دۆسیە لە دژوە سەرپێچیکارەیل یاسای ژینگە واز کریاس، و 5 هەزار و 349 گەردین وەشکین لە شوینە جیاوازەیل ژینگە لە سەرتاسەر هەرێم ئەنجامدریانە".

باس ئەوەیش کرد کە "تیمەیل دەسەگە 55 هەزار و 883 وەشکین ئەنجامداگە ئەرا ئەو سەرچەیل ئاوە کە ئەرا نووشین وەکارتیەن، وە ئامانج دڵنیابوین لە کوالێتی و بیوەیی ئەرا مەردم، بیجگە لە جیوەجیکردن 2 هەزار و 287 چالاکی هوشیاری ژینگەیی و دامەزرانن 134 چەودیاریکردن ژینگە لە پڕۆژە جیاوازەیل".

هەرلیوا، دەسەگە دووپاتیش کرد کە "پڕۆژەی نوو رووشنایی لە هەرێم بەشدار بوود لە لاوردن زیاتر لە هەفت هەزار مۆلیدەی کارەبایی، کە یەیش بازدانیگ چوینایەتییە لە مقیەتیکردن ژینگە، وەتایبەتی وە لەوەرچەوگردن دەردان پیسکەر وای ئی مۆلیدەیلە".

دیاری کرد کە "پڕۆژەگە وەخشین تەواوەتی لە ڕسومات ماشینەیل کارەبایی هاناوی، بیجگە لەوە قەرز وە هاوڵاتیەیل دەێد ئەرا داناین سیستەم وزەی خۆر، یەیش لە چوارچیوەی پاڵپشتیکردن چگن وەرەو سەرچەوەی وزەی پاک و وەردەوام لە هەرێم کوردستان".