ژنەیل لە سلێمانی دەنگیان بەرزەو کەن: رووژ جیهانی ژنان سەکوویگە ئەرا خەبات و ئاڵشتکاری (وینە)
شەفەق نیوز/ ئمڕوو شەممە، شار سلێمانی، رووژ جیهانی ژنان پیرووز کرد، وە سازدان ئاهەنگیل جویراجویر کە چالاکییە رووشنهویری و هونەری و هوشیارکردن لەناوی بوی، وە بەشداری فراوان ژنەیل و ریخریاگەیل مەدەنی.
چالاکییەیل رووشنایی خستنە بان وەرەونوابردن مافەیل ژن و مقیەتیکردنیان لە تونوتیژی و پەراویزخستن، یەیش وەگەرد بانگەوازەیل ئەرا قویلەوکردن رۆڵیان لە کۆمەڵگا.
چالاکوان ماف ژنان، کەژاڵ عەبدولقادر، لە دیداریگ وەرد ئاژانس شەفەق نیوز وت: "دروسکردن کۆمەڵگەی تەندروس لە بویین داڵگیگ هوشیارەو دەسوەپی کەێد، ژن بنەمای پەروەردەکردن نەوەیل و ئامادەکردن خیزانە سەرکەفتگەیلە"، وتیش: "ژنەیل هەرێم کوردستان توانستن سنووردارکردن حزبی بشکنن و تا رادەیگ زیاتر لەناو کارە کۆمەڵایەتییەیل بوین".
کەژاڵ خان باس “گرنگی درویژەدان وە خەبات ئەرا رەسین وە یەکسانی” کرد.
دووپاتیش کر کە " بایەسە ئازار بوودە دەرفەتیگ ئەرا بەرزکردن داواکارییەیل ژن و ژنەفتن دەنگیان لە مافەیل رەوایان".
هەمیش و: "ئی رووژە تەنیا بوونەیگ ئاهەنگگێڕانە نییە، بەڵکم سەکوویگە ئەرا خەبات و داواکاری ئاڵشتکاری".
هەمیش رووشنایی خستە بان ژنەیل کورد کە لە وەرگریکردن لە ماف ژن قوربانی فرەیگ دانە، جویر حەبسەخان نەقیب، قەدەم خێر، خانزاد، کە "کۆت و بەندە سیاسییەیل هیمان پیشکەفتن بزووتنەوەی ژن سنووردار دەکەن، کە ژن وەگورەی سیاسەت حزبی ئاراسە کریەن لەجیای ئەوەگ وەشیوەیگ سەروەخوەیی هازداریان بکەن".
کەژاڵ وتیش: “ژن ئازاد و سەروەخوەیی بنەمای هەر ئاڵشتکارییگ راسگانیە”، هوشداریشدا لە “زیایبوین تونوتیژی وەرانەور ژن لە هەرێم کوردستان، وەتایبەتی کە لەژیر رووشنایی لاوازی سزادان تاوانباران، کوشتن فرە لەبان ژنان هەس، یەیش هیشتیە ژنەیل دەس یەکتر بگرن و وەیەکەو خەبات بکەن ئەرا نواگیریکردن ئی دیاردە”.
لە کۆتایی قسەیلی کەژاڵ عەبدولقادر رەخنە لە بەشیگ ریخریاگ ژنانە گرد کە پارە وەرگرن بەڵام رۆڵیگ کاریگەر نیەڕانن لە مقیەتیکردن ژنان، وتیش: “ئمساڵ ٨ ژن لە تەمەن ١٨ نا ٥٠ ساڵە کوشیانە، وەبی ئەوەگ تاوانبارەیل وەشیوەی خوازیاگ بیریەنە دادگا”.
دەسنیشانکردن رووژ ٨ ئازار جویر رووژ جیهانی ژن گلەو خوەێد ئەرا ساڵ ١٨٥٧، هەنای ژنەیل کراکار لە کارگەی پەڕوو لە نیویۆرک خوەینشاندان ئەنجامدان تا داوای خاسترکردن رەوش کارکردنیان کردن، دەسەڵاتدارەیل وە تونوتیژی ناڕەزایەتییان سەرکوت کردن و لە ئەنجام قوربانی لەناویان کەفت.
ساڵ 1908 نیویۆرک دووارە بایکۆت ژنەیل وەخوەی دی ئەرا داواکردن خاسترکردن کرا و رەوش کار، یەیش گرنگی ئی رووژە نشان دا، و لە ساڵ 1977، نەتەوە یەکگرتگەیل رووژ 8 ئازار جویر رووژیگ فەرمی ئەرا ئاهەنگ وە رۆڵ ژن لە کۆمەڵگا و نواگیریکردن دووچەوەکی و تونوتیژی وەرانەوریان ناسان.
رووژ جیهانی ژن لە کوردستان جویر بوونەیگ خاوەن گرنگی تایبەت مینێد، کە رەنگدانەوەی ئەو قوربانیدانەیلە کە ژنەیل لە بوارە جیاجیایەیل دەن، لە سیاسەتەو تا وەرخودان دژوە ستەم، وەگەرد سەختیەیل وەردەوام، داواکاری ژنەیل هەمیشە ئامادەن ئەرا وەنوابردن یەکسانی و مقیەتیکردن مافەیل ژن لە کۆمەڵگا.
