نێچیرڤان بارزانی: هیمان عراق باج پابەندنەوین وە ڕێککەفتن ئازار دەێد
شەفەق نیوز/ ئمڕوو سێشەممە، نێچیرڤان بارزانی، سەرۆک هەرێم کوردستان، دووپات کرد کە هیمان عراق باج پابەندنەوین وە جیوەجیکردن رێککەفتن 11ی ئازار ساڵ 1970 دەێد، و داوا لە گشت هیزە سیاسییەیڵ هەرێم و وڵات کرد وانەیگ لەی ئەزموونە وەربگرن وەخاتر چەسپانن سیستم فیدراڵی و مقیەتیکردن ماف گشت پیکاتەیل و وەرەونوابردن وەیەکەوژیان ئاشتیانە.
ئەوەیش لە بەیاننامەیگ هات لەلایەن سەرۆک نێچیرڤان بارزانی وەبوونەی 55 ساڵەی رێککەفتن 11ی ئازار 1970، کە وت: “وە سەرکردایەتی بارزانی نەمر، بویە خاڵ وەرچەرخان و وێستگەیگ مێژوویی و گرنگ لە خەبات خەڵک کوردستان، و یەکەم بەڵگەنامەی فەرمی کە دان وە بەشیگ لە مافە رەوایەیل ئی گەلە نریا، و بنەمای یاسایی ئەرا دەستکەفتەیل ئیسەمان دروس کرد، تا هویچ دەسەڵاتیگ لە عراق جاریگ ترەک نەتوانێد نکۆڵی لە مافەگانمان بکەێد”.
هەمیش وت: رێککەفتن 11ی ئازار مۆدێلیگ چارەسەری دادپەروەرانە بوی کە لە بنەمای بنەڕەت لەیەکفامسنن و دیالۆگ دامەزریا، بەڵام دویای ئەوە دەسەڵاتدارەیل عراق لەژیری دەرچگن و دەرئەنجامەگەی چەن دەیە جەنگ و وەردەوەردە بوی کە بیجگە لە کارەسات و ئازار هویچیگ ترەک ئەرا عراق نەهاورد.
سەرۆک هەرێم کوردستان وتیش: "ئمڕوویش عراق باج پابەندنەوین وەی رێککەفتنە و بنەڕەت هاوبەشی راسگانی و مافە دەستوورییەیل گشت پێکهاتەیلی دەێد".
بارزانی وتیش: وانە و ئەزموونەیل گوزەشتە چەسپانن کە سەقامگیری وەدی تیەێد بیجگە لە ری دیموکراسی کە دروشم شووڕش بوی، و وە رێزگرتن لە فرەیی و کردەوەی هاوبەش و چەسپانن دادپەروەری و یەکسانی لە ناوەین گشتی.
نێچیرڤان بارزانی لە بەیاننامەگە وتیش: “یەکڕزی و یەکگرتگیی گەرەنتی راسگانی مقیەتیکردن دەستکەفتە دەستوورییەگانمان و ئایندەی نەوەیل هاتگمانە”، داوا لە “گشت هیزە سیاسییەیل، کوردی و عراقی کرد، وانەیگ لەی ئەزموونە یایبگرن، و وە گیان وەرپرسیارێتی نیشتمانی وەیەکەو کاربکەیمن، ئەرا چەسپانن فیدراڵیزم، مقیەتیکردن ماف گشت پیکاتەیل عراق، و وەرەونوابردن وەیەکەوژیان ئاشتیانە”.
دووپاتیش کرد کە "بانان عراق جیوەجیکردن دەستوور و پتەوکردن هاوبەشی راسگانی و بیناکردن وڵاتیگ خوازێد کە ئاسایش و سەقامگیری و دادپەروەری لەناوی زاڵ بوود".
