نێچیرڤان بارزانی خوەشحاڵی خوەی وە دەرهاوردن سووریا لە لیست تیرۆر نیشان دەێد: گامیگە وەرەو ئارامی
شەفەق نیوز- هەولێر
سەرۆک هەرێم کوردستان نێچیرڤان بارزانی، ئمڕوو سێشەممە، خوەشحاڵی خوەی نیشان دا وە بڕیار ویلایەتە یەکگرتگەیل ئەمریکا ئەرا دەرهاوردن ناو سووریا لە لیست ئەو دەوڵەتەیلە کە پاڵپشتی تیرۆر کەن.
بارزانی، لە پۆستیگ لەبان سەکوو "ئێکس" کە ئاژانس شەفەق نیوز وەدۊای کەفت، وت کە ئی گامە گرنگییگ گەورە دیرێد ئەرا پاڵپشتی خاسەوبۊن سووریا و سەقامگیری و گەشەسەنینی، و قایمکردن گلەوخواردنی ئەرا رۆڵ ئاسایی خوەی لە ناوچەگە و جەهان.
ئومید خوەی نیشان دا کە ئی گامە هاوبەش بوود لە دروسکردن بانانیگ ئارام کە مافەیل گشت پێکهاتەیل سووریا بپارێزێد، و ئاسوویلیگ فراوانتر واز بکەێد ئەرا وەرەونوابردن پەیوەندییەیلی وەگەرد عراق و هەرێم کوردستان، و فراوانکردن هەماهەنگی لە بوارە جیاوازەیل وە جۊریگ کە خزمەت بەرژەوەندییە هاوبەشەیل بکەێد.
ئیدارەی ئەمریکی، دۊکە دوشەممە، بڕیار دەرهاوردن ناو سووریا لە لیست دەوڵەتەیل پاڵپشتیکەر تیرۆر دەرکرد، لە شان هەڵوەشانن پۆلێنکردن "بەرەی نوسرە"، کە سەرۆک ئیسەی سووریا ئەحمەد شەرع سەرکردایەتیی کرد، چۊ رێکخراویگ تیرۆریستی.
ئاژانس "رۆیتەرز" دیاری کرد کە ئاگادارییگ دەرچگ لە وەزارەت گەنجینەی ئەمریکی نیشان دا کە وەزارەت دەیشت، ئمڕوو، خستنە ناو سووریا لەبان لیست ویلایەتە یەکگرتگەیل ئەرا دەوڵەتەیل پاڵپشتیکەر تیرۆر هەڵوەشانیەسەو، لە گامیگ کە ئەرا یەکەم جار لە وەختیگ وەرین لە ئمساڵ راگەیانریاوێد، و مەرجدار بۊ وە چەوپیاخشاننیگ لەلایەن کۆنگرێسەو.
هەمیش ئاگادارییەگە هەڵوەشانن پۆلێنکردن "بەرەی نوسرە" لەخوەی گرت، کە وە ناو "دەسەی تەحریر شام"یش ناسیەێد، چۊ گرووپیگ تیرۆریستی.
