نێچیروان بارزانی و سودانی دووپات لەبان مەنین عراق دویر لە جەنگەیل کەن
شەفەق نيوز/ نێچیروان بارزانی سەرۆک هەرێم کوردستان، و محمد شیاع سودانی سەرۆک وەزیرەیل عراق، ئمڕوو چوارشەممە، دووپات لەبان گرنگی دویرخستن عراق لە جەنگ و ململانيەیل ناوچەگە کردن.
ئەوەیش لە دیداریگ هات کە لە پارێزگای سلێمانی گردیانەو کرد، کە باس رەوشەیل گشتی و گرنگترین پرسەیل ئەوزەڵداین و ئابووری لە ئاست نیشتمانی هات، وەگورەی بەیاننامەیگ لەلایەن نویسنگەی سودانی.
بەیانامەگە وتیش: لە دیدارەگە باس رەوشەیل سیاسی لە وڵات و پرسەیل هاوبەش کریا، و دووپاتکردن لەبان وەردەوامی هەماهەنگی و هاوکاری ناوەین حکومەت فیدراڵی و حکومەت هەرێم کوردستان، وەشیوەیگ پاڵپشتی لە یەکێتی رز نیشتمانی بکەێد، و خزمەت بەرژەوەنیەیل باڵای عراق بکەێد.
وتیش: دووپات کریا لەبان گرنگی مسۆگەرکردن مافەیل دەستووری ئەرا گشت پیکاتەیل، و پاڵپشتیکردن هاوکاری ناوەین گشت هیزەیل نیشتمانی، ئەرا مقیەتیکردن ئاسایش و ئارامی وڵات، و پشتگیریکردن تەقەلایل حکومەت فیدڕاڵی لە جیوەجیکردن پڕۆژەیل گەشەپیدان لە گشت عراق.
وەگورەی بەیاننامەگە، لە دیدارەگە باس رەوشەیل هەرێمی و ناودەوڵەتی کریا و کاردانەوەی لەبان عراق، و دووپاتکردن لە گرنگی دویرخستن عراق لە جەنگەیل، و پشتگیریکردن ئەو هەڵمەتەیلە کە چارەسەریەیل ئاشتەوایی گرنەو لە یەکلاییکردن قەیرانەیل هەرێمی.
