نێچیروان بارزانی وەگەرد "ئەبولغیت" باس پەیوەندییەیل کوردستان وە جامیعەی دەوڵەتەیل عەرەبی کەێد
شەفەق نيوز/ نێچیروان بارزانی سەرۆک هەرێم کوردستان، ئمڕوو شەممە، چەوی کەفتە ئەحمەد ئەبولغیت سکرتێر گشتی جامیعەی دەوڵەتەیل عەرەبی، ئەوەیش لەناو بەرنامەی بەشداریکردنی لە کۆڕبەند دیبلۆماسی ئەنتاڵیا.
نویسینگەی راگەیانن سەرۆکایەتی هەرێم کوردستان لە بەیاننامەیگ رەسیە ئاژانس شەفەق نیوز وت: لە دیدارەگە باس پەیوەندییەیل ناوەین عراق و هەرێم کوردستان وەگەرد جامیعەی دەوڵەتەیل عەرەبی کریا، هەمیش پەیوەندییەیل هەولێر و بەغدا، و گەشەیل سیاسی لە عراق و ناوچەگە، و گرنگی مقیەتیکردن ئارامی و بەرزکردن گفتوگۆ ئەرا چارەکردن گیچەڵەیل.
بارزانی وەگورەی بەیاننامەگە، دەسخوەشی لە تەقەلایل جامیعەی دەوڵەتەیل عەرەبی کرد لە مقیەتیکردن ئاشتی و ئارامی لە ناوچەگە، و رۆڵ ئەبولغیت و جامیعەی دەوڵەتەیل عەرەبی لە نزیکەوکردن نووڕینەیل ناوەین دەوڵەتەیل ئەندام.
لەلای خوەییش، ئەمیندار گشتی جامیعەی دەوڵەتەیل عەرەبی پیشکەفتن و رۆڵ هەرێم کوردستان لە مقیەتیکردن ئاشتی و ئارامی لە عراق و ناوچەگە وە کاریگ گرنگ زانست.
