نێچیروان بارزانی: پرس ئاشتی لە تورکیا دەرفەتیگ میژووییە ئەرا پتەوکردن ئاسایش لە ناوچەگە
شەفەق نيوز/ نێچیروان بارزانی سەرۆک هەرێم کوردستان، ئمڕوو چوارشەممە، پاڵپشتیکردن هەرێم کوردستان نووەو کرد ئەرا پاڵپشتیکردن پرس ئاشتی ناوەین حکومەت تورکیا و پەکەکە، و وت: یە دەرفەتیگ میژوویە ئەرا پتەوکردن ئاسایش لە ناوچەگە.
سەرۆک نێچیروان بارزانی لە وتاریگ لەناو دیدار سلێمانی وە چاپ نوهەمی وت: جیهان ئیرنگە کەفێدە سەختیەیلیگ هاوبەش، وەتایبەت لە چین ئاڵشتبوین کەشوهەوا کە رخداری لەبان ئاسایش خوەراک دیرێد, هەمیش کووچبەری و تیرۆر و بڕیگ لە رخدارەیل ترەک هەس کە هەڕەشەی ئیرنگە و بانان لەبان جیهان و مرۆیی دەێد.
وتیش: ئی کاریگەرییەیلە وە ئاشکرا کەفێدە وەر چەومان لە بڕیگ ناوچەیل عراق، کە هەزاران کەس ناچار بوین شوین داکاسیان خوەیان ئاڵشت بکەن لەوەر کەمئاوی.
وتیش: ئیمە لە هەرێم کوردستان باوەڕ وە گرنگی هاوکاری و کار هاوبەش و هەماهەنگی ناودەوڵەتی دیریمن ئەرا نواگیریکردن ئی سەختیەیلە، و باوەڕ دیریمن کە بایەسە کۆمەڵگای ناودەوڵەتی وەرپرسایەتی هاوبەش هەڵگرێد وەرانوەر ئەو پرسەیل جیهانییە کە پەیوەندی وە گشت مرۆڤایەتی دیرن.
سەرۆک هەرێم کوردستان وتیش: لەناو ئی هەمکەی سەختیەیلە، خوەشاڵیمن گەشەیلیگ ئەرێنی لە ناوچەگە بوینیمن، کە خوازن ئاشتی وەدەس بارن، وتیش: ئەو تەقەلا کە تورکیا وەی دویاییە وەخوەی دی وەرەو وەدەسهاوردن ئاشتی، کاریگ و دەرفەتیگ میژووییە، و ئیمە دووپات لە پیشوازیکردن پشتگیریکردنی کەیمن ئەرا سەرکەفتنی وە گشت شیوەیگ.
وتیش: ئی دەرفەتە ئەرا پاڵپشتیکردن ئارامی لە ناوچەگە و وازکردن لاپەڕەی نوویگ لە هاوکاری بیناکەر کە ئەوەسا سوودی ئەرا گشت ناوچەگە گلەو خوەێد.
