نێچیروان بارزانی داوا لە سودانی کەێد دەسەی مادەی 140 بخەێدە کار و لەبان هەڵەبجە سوپاسی کەێد
شەفەق نيوز/ نێچیروان بارزانی سەرۆک هەرێم کوردستان، ئمڕوو چوارشەممە، داوا لە محمد شیاع سودانی سەرۆک وەزیرەیل کرد دەسەی مادەی 140 لە دەستوور بخەێدە کار، کە پەیوەندی وە ناوچەیل کوردی دابریاگ دیرێد، و لە خود وەختەگە دەسخوەشی لە ڕۆڵی لە وەپارێزگاکردن هەڵەبجە کرد.
نێچیروان بارزانی لە وتاریگ لەناو دیدار سلێمانی وە چاپ نۆهەمی وت: لە هەرێم کوردستان، وەتایبەت پەیوەندیمان وەرد حکومەت فیدراڵی لە بەغداد، دووپات لە پابەندبوین تەواومان وە دەستوور عراقی کەیمن، جویر چوارچیوەیگ ئەرا ڕێکخستن ئی پەیوەندییە، کە ئیمە باوەڕ دیریمن دەستوور وە بنەمایەیل فیدڕاڵی و فرەیی و هاوبەش، گەرەنتی راسگانیە ئەرا ماف گشت پیکاتەیل عراق وەبی دووچەوەکی.
وتیش: لەی ماوەی دویاییە وەرەونواچگن وەرچەویگ لە چارەکردن پرسەیل ناوەین هەولێر و بەغدا بوی، وە خاسی ئەو تەقەلایل سوپاسلیکاریاگە لەلایەن محمد شیاع سودانی سەرۆک وەزیرەیل، ک جی گشت رێزیگە لە ئیمە، وتیش: نووڕین سودانی لە پتەوکردن بەشکاریەیل و کەمەوکردن ناکۆکییەیل، نووڕینیگ راساییە ئەرا چارەسەرکردن، و لێرا دووپات کەن لەبان جیوەجیکردن زویوەزوی ئەرا یاسای گلەوداین ماڵداری و وەکارخستن کەسەی جیوەجیکردن مادەی 140 لە دەستوور عراقی.
نێچیروان بارزانی دووپاتیش کرد کە ئەوەسا وەردەوام بویمن لە گفتوگۆ بیناکەر زەرد حکومەت فیدراڵی ئەرا رەسین وە چارەسەریەیل هەمیشەیی ئەرا گشت گیچەڵەیل، وەشیوەیگ خزمەت بەرژەوەنی گشت پیکاتەیلی بکەێد، و مسۆگەر و گەرەنتی ماف و شایستەیل دەستووری گشتی بکەێد.
دووپات کرد کە بایەسە پەرلەمان کوردستان کارا بوود لەسای رەوش و سەختیەیل ئیسە لە ناوچەگە، ئەراوە یەکەمین ئەرک پارت دیموکرات کوردستان و یەکێتی نیشتمانی کوردستان و لایەنە سەرکەفتگەیل لە هەڵوژاردن پەرلەمان کوردستان زویوەزویکردنە لە دروسکردن کابینەی حکومەت نوو هەرێم کوردستان، و حکومەتیگ بوود وەڵام خوازین و نووڕینەیل مەردم بەێد وەشیوەیگ گونجیاگ وەرد گەشە و سەختیەیل.
