نزیکەی یەک مەلیۆن ناونشان لەناو کتاوخانەیل هەرێم کوردستان هەس

2023-01-24T11:16:16.000000Z

شەفەق نیوز/ حکومەت هەرێم کوردستان، لە بنەمای ئازادی و دیموکراتی و ئازادی وشە رەفتار کەێد، ک هویچ چەودیاریکردن لەبان نویسین و چاپکردن و بڵاوکردن زاڵ نەکردیە، وە مەرجیگ ئاسایش کۆمەڵگا نەشیونێد، ولێرەو، بڵاوکردن کتاو لە هەرێم کوردستان گەشە کەێد و گورجەو بوود، ک جویر بازاڕیگ روشنهویری وەشیوەی بەرزیگ دریەێدە قەڵەم، ک هیشت کتاوخانەی کوردی دەوڵەمەنتر و تەواوتر بوود. 

 وەگورەی یاسا، هەر کەسیگ یا دامەزراویگ یا ناوەندیگ بخوازێد کتاو بڵاو بکەێد، بایەتە یەکەم جار شمارەی توومارکردن کتاو لەڕی وەڕیەوبەرایەتی گشتی کتاوخانەیل گشتی لە هەرێم کوردستان وەربکرێد، ک هەیشت وەڕیەوبەرایەتی گشتی دیرێد (هەولێر ، سلێمانی، دهۆک، هەڵەبجە، گەرمیان، راپەڕین، زاخۆ، سۆران)، ک ئیرنگە وەڕیەوبەرایەتی زاخۆ واز کریا، و وەڕێەوبەرایەتی سۆرانیش، ئەرا ئاسانکردن کار نویسەر و بڵاوکەرەیل.

 لەی باوەتە، دیاری عەزیز، وەڕیەوبەر گشتی کتاوخانەیل هەرێم کوردستان لە چەوپیکەفتنیگ وەگەرد سایت فەرمی حکومەت هەرێم کوردستان وت: دامودەزگایل و ناوەندەیل و نویسەرەیل وەشیوەی گشتی ک شمارەی چاپ لە وەڕیەوبەرایەتی گشتی وەرگرن، هویچ گیچەڵیگ نیەکەفێدە نوایان، و ریکارەیل ئاسانیگ نریاگە ک تەنیا چەن زانیارییگ سەرەتایی خوازێد، جویر ناو نویسەر و ئەڵگەردانکار و چاپخانە و چاپیگ لە کتاوەگە، ئیجا شمارەیگ وەپی دریەێد، و بایەتە ئەو شمارە لەناو کتاوەگە چاپ بکریەێد.

وتیش: هویچ چەودیاریکردن لە هەرێم کوردستان نییە قەیەغەی دەرکردن شمارەی چاپ بکەێد، باوجی ئەگەر کتاوەگە وەگەرد بنەمایل ئاین و وڵات و کۆمەڵگا و راسی میژوو نەوود، ئیمە تەنیا ئاگادار وەزارەت روشنهویری کەیمن، و ئەوان هەڵسەنگاندن وەڕی دەسەیگ ئەرای کەن، تا بڕیاریگ بیەن، و لەبان ئەوەیش، لە ماوەی دوو ساڵ گوزەشتە هویچ کتاویگ قەیەغە نەکریاگە.

 وەڕیەوبەر گشتی کتاوخانەیل گشتی لە هەرێم کوردستان وتیش:  ساڵانە شمارە وە زیاتر لە ٥٠٠ کتاو وە گشت زوانەیل دریەێد، و شمارەی چاپ وەئەو پیکاتەیلیش دایمنە، جویر کلدان و ئاشوری و ئەرمەنی ئەرا ئاسانکردن کاریان.

 لە هەرێم کوردستان ٩٢ کتاوخانەی سەروە وەڕیەوبەرایەتی گشتی کتاوخانەیل گشتی هەس، 858 هەزار و 951 کتاو هاناویان:  (هەولێر: 30 کتاوخانە،  276 هەزار و 866 کتاو ها ناویان، سلێمانی: 26 کتاوخانە، 350 هەزار و 984 كتاو، دهۆك: 8 کتاوخانە،  74 هەزار كتاو، هەڵەبجە: 6 کتاوخانە، 32 هەزار و 689 كتاو، راپەڕین: 12 کتاوخانە، 39 هەزار و 689 كتاو،  گەرمیان: 10 کتاوخانە،  84 هەزار و 493 كتاو).

و لە ماوەی سێ ساڵ گوزەشتە، ئامارەیل وەیجویرە بوین:

یەکەم: شمارەی سەردانکەرەیل 155 هەزار 697 (هەولێر: 32 هەزار و 658 کەس، سلێمانی: 93 هەزار و 992 کەس، دهۆک: 13 هەزار و 25 کەس، هەڵەبجە: 6 هەزار و540 کەس، گەرمیان: هەزار و 784 کەس، رابرين: 7 هەزار و 698 کەس).

دویەم: شمارەی چاپ و توومارکردن لە کتاوخانەی گشتی ئەرا کتاوەیل  9 هەزار  و 331 شمارە وەگورەی  پارێزگایل وەیجویرە: (هەولێر: 3 هەزار و 984 شمارە ، سلێمانی: 3 هەزار و 360 شمارە، دهۆک: هەژار و 987 شمارە).

Shafaq Live
Shafaq Live