لە زانکۆی کوردستان.. شارەزایەیل ناودەوڵەتی باس لە پێگەی زانستی زوان کوردی و پاراستنی کەن
شەفەق نیوز - هەولێر
شمارەیگ لە شارەزایەیل و توێژەرەیل زوانەوانی لە وڵاتەیل ئەوروپا رەسینە شار هەولێر، تا لە زانکۆی کوردستان باس لە پێگەی زانستی زوان کوردی بکەن. ئی کۆنگرە وە یەکەم دەسپێک ئەرا دامەزرانن ئی چوارچمگە زانستییەیلە تایبەت وە زوان کوردی دانریەێد، و رێیەیل پاراستن ناسنامەگەی لە ناوەندە ئەکادیمی و زانستییەیل، چ لە ناو وڵات یا لە دەیشت بوود.
لە لای خوەیەو، ئارجین ئۆپنکین، مامۆستای زوان ئینگلیزی لە زانکۆی کوردستان ئەرا ئاژانس شەفەق نیوز وت: "ئی کۆنگرە یەکەمینە لە جۊر خوەی ئەرا دیاریکردن پێگەی زانستی زوان کوردی، و کۆبوینەوەیلی ساڵانە وەگورەی زنجیرەی پەسەنکریاگ بەسریەن؛ کە بژاردەیگ لە توێژەرەیل زوانەوانی بەشداری لەناوی کەن، وەتایبەت پسپۆڕەیل زوانە زینگەیل جەهان، ئەرا بەراوردکردنی وەگەرد پێگەی زانستی زوان کوردی، ئەوەیش ئەرا دڵنیابوین لە چەسپانن شوین زانستی زوان کوردی لە شان زوانە زینگەیل جەهان - کە کوردی یەکیگە لەلیان - لە شان جواوداین پرسیارەیل پەیوەنیدار وە رێڕەو ئایندەی".
وتیش "تەقەلا دەیمن جواو پرسیاریگ بەیمنەو کە ئویشێد وەبان پشتبەسان وە زوان ئینگلیزی وە شیوەیگ فراوان ئەرا زانست و تەکنەلۆژیا و جویر زوانیگ فەرمی لە فرە وڵاتەیل جەهان، باوجس گشت نەتەوەیل زوانە رەسەنەیل خوەیان پاراستنە، و هەمان باوەت ئەرا زوان کوردیش دروسە، وەتایبەت لە هەرێم کوردستان کە فرەڕەنگی ئایینی و زوانی فرەپێکهاتە لە خوەی گرێد. لە ئی روانگەو، زوان کوردی تۊیەنێد ناسنامە و پێگە زانستییەگەی بپارێزێد، و هویچ رخدارییگ نییە لە ئیسە هەڕەشە لە بوینی بکەێد".
ئارجین ئاشکراکرد "کۆنگرەگە 14 توێژینەوەی زانستی جۊراوجۊر لە خوەی گرێد کە دەربارەی زوان کوردین، و ئەرا گفتوگوو و لێکۆڵینەوە وە بەراورد وەگەرد زوانەیل تر خریانە ڕوی، جویر زوانە نیشتمانییەیل سویسرا و زوان سکۆتلەندی و چەن زوانیگ تر ئەوروپی، ئەرا دیاریکردن رەهەندەیل و پێگە زانستییەگەی".
دیاری کرد، زانکۆی کوردستان، وەبان ئەوەگ زانکۆیگ فەرمییە لە عراق و پشت وە زوان ئینگلیزی جویر زوان خوەنن بەسێد، باوجس بڕیگ لە تەمەیل و بڕیار و گامەیل زانستی و کردەیی جیوەجی کەێد ئەرا دڵنیابوین لە گرنگیداین خوەنەوارەیلی وە هەردوگ زوان کوردی و عەرەبی لە شان ئینگلیزی.