لە پەراویز کۆڕبەند ئەنتاڵیا.. نێچیروان بارزانی چەوی کەفێدە نوینەر یەکێتی ئەوروپا ئەرا ناوچەیل کەنداو

شەفەق نيوز/ نێچیروان بارزانی سەرۆک هەرێم کوردستان، ئمڕوو شەممە، چەوی کەفتە لويجی دی مايو، نوینەر تایبەت یەکێتی ئەوروپا ئەرا ناوچەیل کەنداو، ئەوەیش لە چالاکیەیلی لەناو کۆڕبەند دیبلۆماسی ئەنتاڵیا.

 سەرۆکایەتی هەرێم کوردستان لە بەیاننامەیگ رەسیە ئاژانس شەفەق نیوز وت: لە دیدارەگە باس شیوەیل پاڵپشتیکردن پەیوەندییەیل ناوەین هەرێم کوردستان و یەکێتی ئەوروپا کریا، و دووپاتکردن لە گرنگی فراوانکردن چینەیل هاوکاری هاوبەش لە جویراجویر کەرتەیل گرنگ.

هەردوگ لایەن هەمیش باس دویاترین نووەوبویەل هەرێمی و ناودەوڵەتی، و کاریگەرییەیلی لەبان عراق و کوردستان و ناوچەی کەنداو وەگشتی کردن.

هەردوگ لایەن دووپات لەبان گرنگی مقیەتیکردن ئاسایش و ئارامی لە ناوچەگە وەڕی خاوەندارییەتی گفتوگۆ ئاشتەوایی و لەیەکفامسنن هاوبەش جویر ئامرازیگ ئەرا چارەکردن قەیرانەیل و نەهیشتن زیایبوین ژاوەژاو، وەگەرد ئامادەیی یەکێتی ئەوروپا ئەرا رانین رۆڵیگ کارا لە تەقەلایل ئارامی ناوچەگە.

 دویەکە جمعە، نێچیروان بارزانی سەرۆک هەرێم کوردستان رەسیە تورکیا، ئەرا بەشداریکردن لە کۆڕبەند دیبلۆماسی ئەنتاڵیا لە چاپ چوارەمی، و لەورا چەوی کەفتە رەجەب تەییب ئەردۆگان سەرۆک تورکیا، و ئەحمەد شەرع سەرۆک سوریا.

 کۆڕبەندەگە وە چەودیاریکردن فەرمی لەلایەن رەجەب تەییب ئەردۆغان سەرۆک تورکیا، و رێکخستن وەزارەت دەیشت تورکیا وەڕیەو چوود، لەژیر دروشم گردن دیبلۆماسی لەناو جیهانیگ بەشەوکریای.

کۆڕبەندەگە تا ماوەی سێ رووژ وەردەوامە لە 11 - 13ی نیسان، و نزیکەی چوار هەزار میوان لە ناو و دەیشت تورکیا بەشداری لەلی کەن، لەناویان 20 سەرۆک دەوڵەت و سەرۆک حکومەت،  و50 وزير دەیشت، و70 وەزیر ترەک لە جویراجویر دەوڵەتەیل، وەگەرد 60 نوینەر پایەبەرز لە ریخریاگەیل ناودەوڵەتی.