قەوریگ وەناو خوەی دیرێد.. دویەتیگ ئێزدی دویای ١٠ مردن زنیەو بوود.. وینە
شەفەق نیوز/ بنەماڵەی دویەتیگ ئێزدی خەڵک ئاوای کۆجو باشوور قەزای شنگال لە پارێزگای نەینەوا، بڕوا نەیاشتن دویەتەیان زنی بوود، دویای داگیرکریای ئاواییان لەلایەن ریخریاگ داعش لە ساڵ ٢٠١٤، تا قەوریگ جویر نشانە ئەرای کەنین لە قەورسان کۆجو.
وەلێ دویای زیاتر لە دە ساڵ، ئمڕوو سلڤانا خدر ئەرا باوەش خیزانەگەی لە پارێزگای دهۆک لە هەرێم کوردستان گلەو خوارد.لە سیمایگ تیکەڵا ناوەین خوەشی و تەنگی، خدر باس هەسەیل خوەی کرد کە وت: یە ساڵەیل درویژیگە چەوەڕی ئی رووژە کەم، خوەشاڵم کە چەوم کەفتە تەنیا خوەشکم کە لە بنەماڵەگەم مەنیەسەو. لە هویردەکاریەیل خوسەداری، سلڤانا ئەرا ئاژانس شەفەق نیوز باس چارەنویس کەسەیل خیزانەگەی کرد: باوگ و برای گەورەم وەدەس داعش کوشیت، و نیەزانیمن داڵگم و برای گەورەم چە وەسەریان هات، کە هیمان بیسەروشوینن. یەکیگ لە کەسوکارەیلی وەناو رەعەد ئەحمەد ئویشێد: سلڤانا کەفتە وەر رڤیلت دویای داگیرکاری ریخریاگ داعش لە ناوچەیل شنگال لەساڵی ٢٠١٤، و دویای مینەکردن دویرودرویژیگوەبی رەسین وە ئەنجام، رەسینە ئەو باوەڕە کە مردیە، ئەراوە قەوریگ نشانەیی ئەرای کەنین لە قەورسان کۆجو. ئەحمەد ئەرا ئاژانس شەفەق نیوز وتیش: وەلێ دیاری ئی هەمکەی ساڵەیلە سلڤانا وەبیوەی ئەرا ناو خیزانەگەی گلەو خوارد، و خوەشی فرەیگ دیرێد. جی باسە کە ئاوای کۆجو یەکیگ لە ناوچەیلە بوی کە فرەترین زەردمەن بوین لە داگیرکاری ریخریاگ داعش لە ساڵ ٢٠١٤، کە کوشتار و تاوانەیل وەحشیانە وەخوەی دی.
