"قەزای ئاکرێ".. روانگە قۆناغ سێیەم ئەرا پرۆژەی چنین یەک ملیۆن دار بەڕوو دەس وەپی کەێد (وینە)

شەفەق نیوز - دهۆک

دامەزراوەی روانگە، رووژ شەممە، قۆناغ سێیەم لە پرۆژەی چنین یەک ملیۆن دار بەڕۊ لە قەزای ئاکرێ لە پارێزگای دهۆک جیوەجی کرد، وە بەشداریکردن فرەتر لە 700 خوەیبەخش.

دامەزراوەگە لە بەیاننامەیگ کە رەسیە ئاژانس شەفەق نیوز باس لەوە کرد، کە ئی پرۆژە تیەێدە ناو چوارچیوەی پابەندبۊن وە بەڵێنەگەی ئەرا چنین یەک ملیۆن دار بەڕۊ لە سەرتاسەر کوردستان، وە دەسنشانکردن ئەوە کە قۆناغ سێیەم وە سەرکەفتگیی جیوەجی کریا لەڕی هەڵمەتیگ گەورە کە ئەرا دوو رووژ وەردەوام بۊ ئەرا چنین تۊمەیل بەڕۊ لە ناوچەی تیشی و ئاوای شرمن لە قەزای ئاکرێ.

 دەسنشان ئەرا ئەوە کرد کە لە هەڵمەتەگە، فرەتر لە 100 هەزار تۊم بەڕۊ چنریا لەلایەن 750 خوەیبەخش لە گەنجەیل، و موختار ئاواییەگە وەگەرد رووڵەیل کۆمەڵگەی ناوخۆیی ئامادەی چاڵاکییەگە بۊن.