فەرمانبەرەیل کوردستان وەبی مووچە جەژن کەن وەگەرد بیدەنگی حکومەت.. وینە

شەفەق نيوز/ جەژن قوربان هات، و فەرمانبەرەیل هەرێم کوردستان بی مووچە مەننە، کە یە چەن ساڵیگە لە هەرێم وەیجویرەس، و قەیرانیگ ئابووری و ئیداری قویلیگ نشان دەێد، وە ئاشکرا لە روی فەرمانبەرەیل خوەیان و خیزانیان دیارە.

  هەرچەن ئەو وتارەیل سیاسیە کە وەی بوونە وتیان، حکومەت فیدڕاڵی بیدەنگ خوەی کردگە، وەبی گامیگ راسگانی ئەرا چارەسەرکردن گیچەڵ مووچەیل یا پەیاکردن جیگریگ وەردەوامی بەشەوکردنی مسۆگەر بکەێد، کە بیزاریی جەماوەری فراوانیگ دروس کرد.

 پەیامنێر ئاژانس شەفەق نیوز وت: فەرمانبەرەیل هەرێم کوردستان، ئمڕوو جمعە، یەکەم رووژ جەژن قوربان کردن، لەناو رەوشەیل ئابووری تاسن، و نەوین تەواویگ ئەرا مووچە، کە لە سای وەردەوامی ناکۆکی ناوەین حکومەت هەرێم و حکومەت فیدراڵی خەرج نەکریا.

  ئی بوونە وەگەرد بەرزەوبوین وتاربێژ و سەرکردەیل سیاسی هات کە هوشداری لە کاریگەری وەردەوامبوین ئی ستەمە لەبان ژیان هاوڵاتیەیل و ژیانگوزەرانییان دان.

جی باسە کە قەیران مووچە لە هەرێم کوردستان چوودەو ئەرا مانگ حوزەیران ساڵ 2014 کە دەسکریا بەشەوکردن مووچە وە شیوەی ناڕێک و میکانیزمەیل بڕیان گەورەیگ، کە وەڕاستەخۆ کاریگەری لەبان ژیان فەرمانبەرەیل داشت، لە وەختیگ بازاڕ وەردەوام گرانەو بوود هەرچەن نرخ دۆلار داوەزیاس.

   لە وتار جەژن قوربان لەی رووژە، شمارەیگ لە ئیمام مزگەفتەیل لە هەرێم کە پەیامنێر ئاژانس شەفەق نیوز لە بەشیگیان ئامادە بوی، دووپات کردن ئەگەر سەردان ماڵیگ لە جەژن کردیمن، و دیمن خاس ئامادەکاری نەکردوێن، نەبایەس گلەیی لەلییان بکەیمن، چوینکە ستەم لەبانیان گەورەس، و نەبایەس بخەیمنەی پشتگووش.

  لەلای خوەییش، پشتیوان سادق وەزیر ئەوقاف لە حکومەت هەرێم کوردستان، لە وتاریگ ئەرا رووژنامەنویسەیل کە ئاژانس شەفەق نیوز چەودیاریی کرد، باس نیگەرانی فرەی وەرانوەر بڕیار حکومەت فیدڕاڵی کرد وە وسانن خەرج مووچەیل لە جەژن، کە وت: ئیمە فرە نیگەرانیمن کە حکومەت فیدڕاڵی لە بوونەیگ ئاینی گەورە مووچە بڕیە، کە بڕیاریگ نا دەستووری و نایاساییە، باوەڕ نیەکەن حکومەتیگ لە جیهان ئی کارە لەیجویرە بوونەیگ بکەێد.

  وتیش: ئی بڕیارە لە لایەن ئاینی و مرۆیی پێشیلکارییگ رخدارە، و لە هیچ وڵاتیگ ترەک وەیجویرە نەیمنە، ئومید دیریمن سەرکردایەتی سیاسی لە هەرێم جویلەیگ دویای جەژن بکەێد ئەرا چارەسەرکردن ریشەیی ئی قەیرانە.

 هەلیوا، مەسعود بارزانی سەرۆکی پارت دیموکرات کوردستان، باس بڕیار بڕین مووچەیل وە ستەم و نا شەرعی کرد، دووپاتیش کرد کە سیاسەت ریڕەوی وەرسگکردن گەل کوردستان فرە جیاواز نییە لە ئەنفال و کیمیایی و جینۆساید رژیم وەڕین.

 بارزانی وتیش: ئیرادەی گەل کوردستان لە گشت ستەم و جینۆسایدیگ هازدارترە، و بایەسە ئەوانەگ دژایەتی گەل هەرێم کەن ئەوە بفامن کە میژوو بەزەیی وەپییان نیاێد، کە گەل کوردستان خوەیڕاگریی وەرانوەر گشت ژوورەیل و پێشێلکاریەیل چەسپان، و هەمیشە وە سەرکەفتن دەرچگ.

 لەناو بیدەنگیگ حکومەتی و نەوین هەر چارەسەرییگ راسگانی لەلایەن بەغدادڕ قەیران مووچەیل لە هەرێم کوردستان زیایەو بوود، لە ناکۆکی سیاسی بوودە کارەساتیگ مرۆیی، لە وەختیگ فەرمانبەرەیل چەوەڕی بڵویزەی ئومیدیگ کەن دویای جەژن، پرسیارەگە هەر لەبان چارەنویس مافەیلیان مینێد، و ئایا لە جەژنەیل ئایندە خوەشی دوینن یا زیانیگ ترەک بوودە بەشیان.