سەندیکای رووژنامەنویسەیل کوردستان دەسکەێد وە هەڵمەت "زوورهاوردن" وەبان حکومەت فیدڕاڵی ئەرا چارەسەرکردن قەیران مووچەیل
شەفەق نیوز/ سەندیکای رووژنامەنویسەیل کوردستان، ئمڕوو جمعە، بڕیار وەزارەت دارایی عراقی ئەرا وسانن مووچەی مانگانەی فەرمانبەرەیل و کراکارەیل کەرت گشتی لە هەرێم شەرمەزار کرد، و بڕیارەگەی وە "گامیگ نامرۆڤانە" و "بەشیگ لە چوارچیوەیگ سیاسی وە ئامانجگردن قەوارەی کوردستان" وەسف کرد.
ئەنجومەن سەندیکای رووژنانویسەیل کوردستان ئمڕوو لە بەیاننامەیگ "نیگەرانی قویل و ئیدانەکردن بڕیارەگەی حکومەت فیدراڵی ئەرا بڕین مووچەی فەرمانبەرەیل هەرێم تەنیا چەن رووژیگ وەرزە جەژن قوربان" نشان دا.
لە بەیاننامەگەی وت: "ئەنجومەن سەندیکا ئی گامە وە نامرۆڤانە وەسف کەێد و بەشیگە لە ریکاریگ کە هەرێم و خەڵک مەدەنی کەێدە ئامانج، وەیی رەچاوکردن بڕیارەیل دادگای فیدراڵی و رێککەفتنەیل هەرێم کوردستان وەرد بەغدا لەبان مافە داراییەیل کوردستان".
ئەنجومەنەگە نیگەرانی خوەی نشان دا "لە کاریگەرییە جدییەیل بڕیار بڕین مووچەی فەرمانبەرەیل هەرێم و کاردانەوەیلی لەبان ئارامی سیاسی و کۆمەڵایەتی عراق وەگشتی، کە ئی بڕیارە پێشیلکارییگ ئاشکرای مافەیل مرۆڤ دروس کەێد".
وەگورەی بەیاننامەگە، دەستوور دووپات کەێد کە عراقییەیل لەوەردەم یاسا یەکسانن وەیی جیاوازی لە بنەمای ڕەگەز، ئاین یا نەتەوە، و مقیەتیکردن کەرامەت مرۆڤ خوازێد، ئەراوە بڕیار بڕین تیکەنان مەردم هەرێم وەتەواوی وەگەرد دەستوور نەگونجیاس و ئی بڕیارە ناڕەوایەش پێشێلکردن سەرەتاییترین مافەیل مرۆڤە لە هەرێم کوردستان.
ئەنجومەنی سندیکا دەسکردە هەڵمەتیگ ئەرا دامەزرانن تووڕیگ یا کۆمەڵەیگ کە لە نوێنەر ریخریاگە پیشەییەیل و ریخریاگەیل کۆمەڵگەی مەدەنی لە هەرێم کوردستان دروس بوود، تا لەی قەیرانە وەیەکەو کاربکەن، وە ئامانج زوورهاوردن وەبان حکومەت فیدراڵی ئەرا پابەندبوین وە پەیمانەیلی ئەرا رەسین وە چارەسەریگ دادپەروەرانە و هەمەلایەنە کە وەپەی دەستوور عراق مافەیل خەڵک هەرێم کوردستان مسۆگەر بکەێد.
