ئەکسیۆس ئاشکرای کەناڵیگ نهێنی لەناوەین ترمپ و سوپای پاسداران کەێد کە نێچیرڤان بارزانی لە هەولێرەو سەرکردایەتیی کرد
شەفەق نیوز- واشنتۆن
ماڵپەڕ "ئەکسیۆس" ئەمریکی، ئمڕوو یەکشەممە، ئاشکرای کەناڵیگ پەیوەندی نهێنی کرد کە ئیدارەی سەرۆک دۆناڵد ترمپ وەگەرد سەرکردایەتی سوپای پاسداران ئیرانی دروسی کردگە، کە سەرۆک هەرێم کوردستان نێچیرڤان بارزانی دەور ناوجیکەر راسەوخۆ لەناوی دیە، لە تەقەلایگ ئەرا دڵنیابۊن لە هەڵوێست دامەزراوە سەربازییەگە کە فرەترین دەسەڵات دیرێد لە ئیران لەو دانوسەنینەیلە کە ئامانج لەلیان کووتاییهاوردن وە جەنگەس.
وەپای ماڵپەڕەگە، ئیدارەی ئەمریکی لە ناوەڕاس ئایار گوزەشتە کەفتە گرفتیگ بنەڕەتی بۊەسەو مەوقەی دانوسەنینەیلی وەگەرد تاران، کە خوەی لە نەۊین توانای لەبان دڵنیابۊن لەوە دیەسەو کە ئایا سەرۆک پەرلەمان ئیرانی محەمەد باقر قالیباف و وەزیر دەیشتەکی عەباس عەراقچی وەڕاسی دەسەڵات واژووکردن رێککەفتن دیرن، یا سەرکردایەتی سوپای پاسداران تۊنێد ئەوەگ رەسیەسە پی هەڵبوەشنێدەو.
"ئەکسیۆس" لەزوان سێ سەرچەوەی ئاگادار وە شیوەیگ راسەوخۆ لەبان پەیوەندییەیلە، کە کۆشک چەرمگ لەوەر یە بڕیار دا کەناڵیگ هاوتەریب وەگەرد سەرکردایەتی پاسدارەیل شۆڕش واز بکەێد، و نێچیرڤان بارزانی ئەرا ئی ئەرکە هەڵوژارد وە مدوو پەیوەندییەگەی وەگەرد واشنتۆن و تاران و پەیوەندییە کۊنەیلی وەگەرد کەسایەتییەیل دیار لەناو رژێم ئیرانی.
لە نزیکەی دە ئایار، وەڕێوەبەر هەواڵگری نیشتمانی ئەمریکی لەو وەختە تۆلسی گابارد پەیوەندی وە بارزانییەو کرد، وەپی راگەیان کە ئیدارەی ترمپ باوەڕ دیرێد کە ئەو تۊنێد گاڵ بەێد لە رەسین راسەوخۆ وە فەرماندەی سوپای پاسداران ئیرانی جەنەڕاڵ ئەحمەد وەحیدی.
وەپای سەرچەوەیل، گابارد دیاری کرد کە پەیوەندییەگە وە رەزامەنی سەرۆک ترمپ و جیگرەگەی جی دی ڤانس کریاگە، و واشنتۆن توایەێد بزانێد ئایا وەحیدی و سەرکردایەتی سوپای پاسداران پشتگیری ئەو رێڕەوە کەن کە قالیباف و عەراقچی دانوسەنین لەبانی کەن، یا مەرج و داواکارییەیل جیاواز دیرن.
بارزانی، وەپای راپۆرتەگە، خاوەن پەیوەندییەیل کەسی دریژماوە وەگەرد وەرپرسەیل ئیرانی، لەناویانیش کەسایەتییەیل باڵا لە سوپای پاسداران، هەرلیوا لە ئیران ژیاگە لەماوەی جەنگ عراقی ئیرانی و لە زانکۆی تاران خوەنیە و وە ئاشکرا قسە وە زوان فارسی کەێد.
سەرۆک هەرێم کوردستان رەزامەنی دا لەبان کلکردن نامە ئەمریکییەگە، وەلی داوا کرد کە پەیوەندییەگەی وەگەرد فەرماندەی سوپای پاسداران وە شیوەیگ راسەوخۆ بوود.
لە 14 ئایار، وەرپرسیگ ئیرانی رەسیە نووسینگەی بارزانی لە هەولێر کە مۆبایلیگ کۆدکریاگ هەڵگردۊد کە لەڕییەو پەیوەندییگ ئارام کریا لەناوەین سەرۆک هەرێمەگە و وەحیدی، وەپای "ئەکسیۆس".
لە پەیوەندییەگە، بارزانی پرسیار لە فەرماندەی پاسداران کرد لەباوەت ئەوەگ ئایا دامەزراوە سەربازییە ئیرانییەگە وسیاسە پشت ئەو دانوسەنینەیلە کە قالیباف و عەراقچی کەنەی، و وەپای سەرچەوەیگ ئاگادار، وەحیدی دووپات لە پشتگیری خوەی ئەرا دانوسەنکارەیل کرد و پاسداران خوازێد قەیرانەگە لەڕی دانوسەنینەو چارەسەر بکریەێد.
دەسوەجێ دۊای کووتاییهاتن پەیوەندییەگە، بارزانی گابارد ئاگادار کرد لە وەڵام ئیرانییەگە، تا ئەویش لە دەور خوەی کۆشک چەرمگ ئاگادار بکەێد، وەپای سێ سەرچەوە کە قسە ئەرا ماڵپەڕەگە کردنە، کە وەرپرسیگ لە ئیدارەی ئەمریکی ها ناویان.
وەلی رۆڵ هەولێر تەنیا لە کلکردن نامەیل نەوەسیا، چۊنکە راپۆرتەگە ئاشکرا کرد کە ئیدارەی ترمپ دۊاتر هۊریگ ناسکتر خستە روی، کە خوەی لە بەسانن دیداریگ نهێنی لەناوەین وەرپرسەیل ئەمریکی و ئیرانی باڵا لە هەولێر وە سەرپەرشتی بارزانی بوی.
سەرۆک هەرێم کوردستان پێشنیارەگە رەسانە لایەن ئیرانی، کە وە شیوەیگ یەکجاری رەتی نەکرد، وەلی رخیگ ئەمنی گەورە نیشان دا لە بەسانن دیدارەگە لە هەرێم کوردستان.
وەپای سەرچەوەیگ ئاگادار لە پەیوەندییەیل، وەرپرسەیل ئیرانی رخیان لە بۊیین توڕیگ فراوان هەواڵگری ئیسرائیلی لەناو هەرێم چگ، و لە ئەگەر کەفتن ئەندامەیل شاند ئیرانی لەڕوی تیرۆرکردن مەوقەی بۊسنیان لە هەولێر یا لەوەخت چگنیان لە ئیرانەو و ئەرای، کە لە کووتایی بۊە مدوو نەوەسانن دیدارەگە.
یەیش دۊای ئەو ئاڵشتکارییە گەورەیلە تیەێد کە دەسەڵات لە ئیران وەخوەیەو دی دۊای کوشیان ریبەر عەلی خامنەیی و شمارەیگ لە وەرپرسە باڵایەیل لە جەنگەگە، و ئەوەگ دۊای ئەوە هات لە بەرزەوبۊن دەسەڵات سوپای پاسداران لە دۆسیەیل ئاسایش نەتەوەیی و سیاسەت دەیشتەکی، کە دۊایینیان وەرگردن سەرکردایەتی گشتی پاسداران بۊ لەلایەن ئەحمەد وەحیدییەو.
تەقەلایەیل رەسین وە رێکخستنیگ نوو لەناوەین واشنتۆن و تاران دەسوەپی کرد دۊای وەسانن تەقەکردن لە هەشتەم نیسان و لۊتکەیگ کە دۊای ئەوە لە ئیسلام ئاباد بەسیا، وەلی پەیوەندییەیل تا ئیسە نەرەسینەسە رێککەفتنیگ.
هێمان ناوجیکەرەیل پاکستانی و قەتەری نامەیل لەناوەین ویلایەتە یەکگرتگەیل و ئیران رەسنن، وەلی سەرچەوەیل هەرێمی ئەرا "ئەکسیۆس" وتن کە دانوسەنینەیل پیشکەفتیگ وەرچەو وەدەس نەهاوردنە.
هەرلیوا، ماڵپەڕەگە ئاشکرا کرد کە نێچیرڤان بارزانی دۊای ئەوە نامەیل ئەرا کۆشک چەرمگ کل کردگە کە لەناوی دووارە خستەسە روی گاڵ بەێد لە دووارە دەسکردن وە دانوسەنینەیل ئەمریکی ئیرانی، لە وەختیگ هێمان ناکۆکییەیل لەباوەت گەروو هورمز و پرسە ئەمنییە هەرێمییەیل ریگری خەنە وەر هەر یەکلاییکردنیگ چەوەڕیکریاگ.
