سەرۆک کوردستان دەسخوەشی لە رۆڵ مەردم عراق لە دەیشت وڵات کەێد لە پتەوکردن پەیوەندی وەرد کۆمەڵگەی ناودەوڵەتی
شەفەق نیوز/ ئمڕوو دووشەممە، نێچیرڤان بارزانی، سەرۆک هەرێم کوردستان، ڕۆڵ مەردم عراقی لە دەیشت وڵات لە پتەوکردن پەیوەندییەیل ناوەین عراق و هەرێم وەرد کۆمەڵگەی ناودەوڵەتی بەرز نرخان، و دووپات لە گرنگی مقیەتیکردن هەمەجویریی ئایینی و کولتووری کرد.
دەسەی سەرۆکایەتی هەرێم لە بەیاننامەیگ رەسیە ئاژانس شەفەق نیوز وت: “نێچیرڤان بارزانی سەرۆک هەرێم کوردستان پیشوازی لە شاندیگ پێکهاتەی عراقی لە ئەمریکا کرد کە مارتن مێنا سەرۆک ژوور بازرگانی کلدان-ئەمریکی سەرۆکایەتیی کرد”.
لە بەیاننامەگە وتیش: "لە دیدارەگە، بارزانی رۆڵ کۆمەڵگەی عراقی لە دەیشت وڵات لە پتەوکردن پەیوەندییەیل ناوەین عراق و هەرێم کوردستان وەرد کۆمەڵگەی ناودەوڵەتی بەرز نرخان"، دووپاتیش کرد لە "گرنگی بەشداریکردنیان لە پاڵپشتیکردن گەشەپیدان ئابووری و بەرزکردن هاوکارییەیل".
بارزانی دووپاتیش کرد لە “گرنگی مقیەتیکردن ناسنامەی نەتەوەیی و فرەچەشنی کولتووری و ئایینی عراقییەیل، و وەرەونوابردن وەیەکەوژیان ئاشتیانە ناوەین گشت پێکهاتەیل”.
لەلای خوەیانیش، ئەندامەیل شاندەگە پیزانین خوەیان ئەرا ئەو کولتوور وەیەکەوژیان وەخشینە نشان دان کە تایبەتمەنی هەرێم کوردستانە، وەگورەی بەیاننامەگە، دووپات لە خواست خوەیان کردن ئەرا “قایمکردن هاوکاری وەرم هەرێم وەتایبەتی لەبوارەیل ئابووری و بەرهەمهاوردن، وەشیوەیگ کە بەشدار بوود لە پێشخستن گەشەپیدان و دروسکردن دەرفەت نوو ئەرا پتەوکردن پەیوەندییەیل ناوەین کۆمەڵگەی عراقی لە دەیشت وڵات و کوردستان”.
لە بەیاننامەگە وتیش: "شاندەگە باس چەن بیرۆکە و پڕۆژەیگ بەرهەمهاوردن لە تەختایی نەینەوا و هەرێم کوردستان کرد".
