ساڵهاتی جبهه‌ی موته‌حد کورد

Category: هــــه‌واڵ كــوردى

Date: 2020-11-19T10:09:18+0000
ساڵهاتی جبهه‌ی موته‌حد کورد

شه‌فه‌ق نیوز- ئازه‌ر مانگ ساڵ 1384 هه‌تاوی، یانێ دسامبر 2005 زایه‌نی، جبهه‌ی موته‌حد کورد، وه کوردی (به‌ره‌ی یه‌کگرتووی کورد)، ده تێهران، بنه‌ڔا نریا.

یه‌کێ له دیاری‌ترین کاره‌یل ئی جبهه، ئه‌ڵگرتن مه‌راسم یه‌کمین ساڵهاتی دامه‌زرانن ئی جبهه بی ک موهه‌ندس به‌هادین ئه‌ده‌ب، نوێنه‌ر پارلمان ئێران و بڕێ تر له که‌سایه‌تییه‌یل کورد ده ئێران، جوور دوکتور ره‌حیم فه‌ره‌همه‌ند،  دوکتور بایه‌زید مه‌ردووخی، دوکتور ئبراهیم یوونسی، یه‌کم ئوستاندار کوردستان ک دۆمای رووخیان رژیم شاهه‌نشاهی بی وه ئوستاندار ئوو یه‌کێ له موته‌رجم گه‌ورا و خاون‌شێواز وه فارسی بی، دوکتور عه‌لی شه‌مس بورهان، موهه‌ندس حوسه‌ین شائووه‌یسی، و بڕێ تر له کورده‌یل ناسریاگ و ده‌سهه‌ڵات‌داریش، ده‌ێ به‌شداری کردن.

له کورده‌یل فه‌یلی، مووسا ئومیدی چالاک سیاسی - مه‌ده‌نی ئیلامی، وه‌رد مسته‌فا به‌یگی (رودوس فه‌یلی)، شاعر، رووژنامه‌وان و چالاک سیاسی - مه‌ده‌نی ئیلامییش، ده‌ێ مه‌راسمه بووه‌ێیان.

عه‌زیز شاهڕوخ، گورانی‌بێژ گه‌ورای کورد، ده ئی ئایینه، کونسرتێ فره خاس و دڵپه‌سه‌ن، ئجرا کرد.

هه‌ر چه‌ن ک ده ئێران، کار کردن و  دامه‌زرانن چشتێ وه نام جبهه ک له به‌شداری کردن چه‌ن حزب و بنگه‌ی سیاسی و نه‌وه‌سیاسی دابمره‌سێ، جه‌واز نه‌دخوازێ، ئوو هه‌ر چه‌ن ئی به‌ره، وه‌ره ناگه‌سه وڵات و ده گشت شاره‌یل گه‌ورای کوردنشین ده ئێران ده‌فته‌ر دیرێ، باوجی هێمان جبهه‌ی موته‌حد کورد، جه‌وازێ ئه‌ڔا کار نه‌گرتگه و چوون‌چشتێ له حزبه‌یل رخنه‌گره ده ئێران، ئه‌ر نه‌ویشیمن ک ئوپوزوسیوونه.

ئێسه، دوکتور فه‌ره‌همه‌ند، به‌رپرس ئی به‌ره‌سه و مووسا ئومیدی، ته‌نیا کورد فه‌یلی ئه‌ندام شه‌ورای به‌ڕێ‌وه‌به‌ری ئی به‌ره‌سه ک سه‌رلق ئوستان ئیلام به‌ره‌یش وه هساو دیاێگ.

related