پەرلەمانتاریگ فه‌یلی: حکومەتەیل ، نەڕەسینە داد کوردەیل فەیلی

شەفەق نیوز/ پەرلەمانتار مازن عەبدولمونعم فەیلی، ئمڕوو یەکشەممە، وت: حکومەتەیل پشت ئه‌ڵپشت نەڕەسینە داد کوردەیل فەیلی و پشت لە قوربانیەیلیان کردنە.

فەیلی،  لە بەیاننامەیگ رەسیە ئاژانس شەفەق نیوز وت: وەرجە چل ویەک ساڵ رژیم بەعس ڕەگەزنامەیلیان  پویچەڵ کرد، و تاکەیل یەک خیزان جیاوە کرد و گەنجەیلیان له‌ سێدارە دا و لەناو زیندانەیلی بیسەروشوونیان کرد، و وە هەڵمەتەیل (تەسفیر) بەد ناو ، بەشیگ  فره‌ لەلیان ئاوارە و فڕەیان داگە بان سنوور ناونی عراق وئیران، رەزێد.

وتیش؛ ئەوەگ نەهامەتیمان زیایەو کەێد ئەوەسە ک حکومەتەیل دویای ٢٠٠٣ساڵ  زەخمەیلیان تیمار نەکردن، ک هیمان ماڵداری فرەی لەلیان گلەو نەخواردن و قەرەبوویگ شایستەیان نەکریا، و هیمان چارەنووس فرە لە کوڕەیلیان نادیارە و لەو نەداری و زیانە ک لەساڵەیل ئاوارەیی وەخوەیان دین قەرەبوویان نەکریا.

فەیلی داوای داد کوردە فەیلیەکان کرد، و چەن خاڵیگ خستە وەردەس ک شایەت لە زیانەیلیان لە سەردەم بەعس ستەمکار سووکەو بکەن. وداوای جیوه‌جیكردن گشت یاسا و بڕیارەیل  كرد ک لە ٢٠٠٣ تا ئیسە دەرچگنە ، وەتایبەت ئەوانەگ پەیوەندی وە باوەتەیل ڕەگەزنامە و بەڵگە فەرمییەکان و ماڵدارییان دیرن، و وەشیوەیگ ک گشت ریکارەیل  ریگر لەنوای جیوەجیکردنیان نەمینێد.

فەیلی داوا لە دامەزراوه‌ی  شەهیدەیل و وەزارەت تەندروسی و لایەنە پەیوەندیدارەکان کرد گرنگی بیەنە باوەت فەیلیە بیسەروشوونەیل كریاگه‌گان  وە ئاشکراکردن چارەنووسیان  ک تا ئیسە چارەنووسیان نادیارە.