دويای دانوسەنین نێچیروان بارزانی.. شاندیگ کورد سەردان بەغداد کەێد ئەرا یەکلاییکردن باوەت مووچە

شەفەق نیوز/ شاندیگ پایەبەرز کورد، ئمڕوو یەکشەممە، دەسکەێدە سەردانیگ ئەرا بەغداد پایتەخت فیدڕاڵی، ئەرا گفتوگۆکردن وەرد وەرپرسەیل لەباوەت مووچەی فەرمانبەرەیل کورد.

سەرچەوەیگ لە وەزارەت دارایی و ئابووری لە حکومەت هەرێم کوردستان، ئەرا ئاژانس شەفەق نیوز وت: شاندەگە وە سەرۆکایەتی وەزیر ئاوات شێخ جەناب چوود، و ئەوەسا وەرد تەیف سامی خانمە وەزیر دارایی فیدڕاڵی گردەو بوود، ئەرا گفتوگۆکردن لە باوەت مووچەی فەرمانبەرەیل.

کوردستانیەیل ئومیدیگ دیرن دویای سەردان نێچیروان بارزانی سەرۆک هەرێم کوردستان ئەرا بەغداد پایتەخت، و چەوکەفتنی وە شمارەیگ لە وەرپرسەیل حکومەتی و حزبی، و دیدارەیلی وەرد هاوپەیمانی ئیدارەی دەوڵەت، ئەرا پەیاکردن چارەسەریەیل گونجیاگ ئەرا باوەتەیل گیرهاتگ دیارترینیان قەیران مووچەی فەرمانبەرەیل. 

نێچیروان بارزانی، لە سەردانەگەی کە رووژ یەکشەممەی گوزەشتە دەسوەپی کرد، لە رووژ سێشەممە تەواو بوی، لە گردەوبوین هاوپەیمان وەڕیەوبردن دەوڵەت بەشداری کرد وە ئامادەبوین محمد شیاع سودانی سەرۆک وەزیرەیل، و مەحمود مەشهەدانی سەرۆک پەرلەمان و وەرپرسەیل ترەک، و هاوپەیمان وەڕیەوبردن دەوڵەت دووپات کرد کە هویچ هەڵوێستیگ سیاسی لە پرس مووچەی فەرمانبەرەیل هەرێم کوردستان نییە، مەگەر تەنیا کارەیل پیشەیی هەی کە توانای رەسین ئەرا شیوەی چارەسەرییان هەس، لەڕی گفتوگۆ و لەیەکفامسنن، دویر لە سەکووەیل پەرەسەنین راگەیانن.   

وەگەرد سەرەتای ساڵ 2025، قەیران مووچەی فەرمانبەرەیل وەردەوامە وە قسەوباس و نیگەرانی خەڵک، کە ئی کارە بویە گەوهور پەڵپەیل مەردم ئەرا چارەکردنی وەشیوەیگ ریشەیی.