خانەقین.. سەختیەیل و چارەسەرەیل و پەککەفتن مادەی ١٤٠

خانەقین.. سەختیەیل و چارەسەرەیل و پەککەفتن مادەی ١٤٠
2025-02-04T09:53:47+00:00

شەفەق نیوز/ لە مانگ تشرین دویەم ساڵ گوزەشتە، وەڕیەوبەر یەکەی ئیداری نوو ئەرا قەزای خانەقین پەسەن کریا، و ئەندازیار جواد فەیزولڵا بویە قایمقام خانەقین.

 لە دیداریگ ئاژانس شەفەق نیوز وەرد قایمقام خانەقین، و لە پرسیاریگ لە باوەت چارەنویس مادەی ١٤٠ لە دەستوورر کە گشتمان زانیمن خانەقین شاریگ کوردنشینە، لە دەیشت ئیدارەی هەرێم کوردستان، ئایا ئەندازیار جواد فەیزولڵا چوین دوینێد ریکارەیل جیوەجیکردن مادەی ١٤٠ وەڕیەو چوود، کە لە وەڵام پرسیارەگە وت: مادەی ١٤٠ لە دەستوور سێ تەوەر هاناوی، گونجانن، هەشمارکاری، ریفراندۆم، کە ئیمە هەر وەردەوام بویمنە لە تەقەلای جیوەجیکردن ئی مادە، وەلێ ریکارەیل وەگورەی ئاست تەمای خەڵک نیین، کە ئی مادە پەکی کەفتیە، و ریکارەیل فرە لاوازە.

       لە قسەیلی ئەرا ئاژانس شەفەق نیوز لە باوەت ئەوەگ بیزار فرەیگ لە خەڵک شار خانەقین کرد، هەمیش ئەوەانەگ لەلای کوردستانەو وەرەو شارەگە تیەن، کە لە خاڵ وەشکین (باوە مەحموی) ماشینەیل فرەیگ وە رزەو وسیەن، و ئەرا ساعەتەیل دویر و درویژیگ، جواد فەیزولڵا وت: راسە، لە وەختیگ ئاڵشتکردن یا ناکۆکی ناوەین ئەو هیزەیلە بوی کە ئەرک ئەو خاڵ وەشکینە گردنە، و لە وەخت دیریگ لە شەو سەردانی کردیمن، وەگەرد پولیس ناوخوەیی و هاتوچو، کە هەماهەنگی کردیمن، و ئیرنگە ریەگە وازە، و خاس وەڕیەو چوود.

  لەلاییگ ترەک، مەردم داد لە دەس سەگەیل وەرەلا کردن، و وەی دویاییە ئاژانس شەفەق نیوز راپۆرتیگ لەبان بڵاوبوین سەگ وەرەلا لە فرەی شارەیل عراق بڵاو کرد، کە لەناوی باس رخداری ئی دیاردە کرد، و تویشهاتن و زەخمداری کەسەیلیگ، و گیانلەدەسدان مناڵیش لەلیەو بوی، کە ئایا هەڵمەتەیل قایمقامیەت خانەقین رەسینە کوو، و ئایا چوین ئی هەڵمەتەیلە وەگەرد داواکەرەیل (ماف ئاژەڵ) گونجێد؟

ئەندازیار جواد فەیزولڵا لەبان ئی پرسیارە وت: بڵاوبوین سەگەیل وەرەلا هەڕەشەی گیانی خەڵکەگە دەێد، و هەڵمەتیل ئیمە یاساییە، و ئەگەر هاوکاری وەلایەن ریخریایەیل ماف ئاژەڵ بوود -ئەگەر هەس- یا کەسەیلیگ گرنگی وەی کارە دەن، توانیمن شوینیگ ئەرا ئی سەگەیلە دیاری بکەیمن، تا ئەو لایەنەیلە مقیەتییان بکەن و ئیوەتیان بکەن، وەلێ رخداریە گەورەگە ئەوەسە کە ئەو سەگەیلە ئەگەر گرنگی وەپییان نەیریەێد، هاتێ لەو شوینە زیاتر هارەو بوون، و لەو شوینە مەرەقەز بوون، ئمجا رخدارییان لەبان مەردم زیاترەو بوود.

       

Shafaq Live
Shafaq Live