حکومەت کوردستان سوو مووچە بەشەو کەێد.. و بڕیگ بڕیار گرنگ دەرکەێد
شەفەق نیوز/ ئەنجومەن وەزیرەیل لە هەرێم کوردستان، ئمڕوو چوارشەممەر وە سەرۆکایەتی مەسروور بارزانی، و ئامادەبوین قوباد تاڵەبانی جیگر سەرۆک وەزیرەیل گردەو بوی، و بڕیگ بڕیار دەرکرد، لەناویان دەسکردن وە بەشەوکردن مووچەی فەرمانبەرەیل لە سوو پەنجشەممەو.
وەگورەی بەیاننامەیگ رەسیە ئاژانس شەفەق نیوز؛ مەسروور بارزانی ئەرکدار وەزارەت دارایی و ئابووری کرد خشتەی بەشەوکردن مووچەی فەرمانبەرەیل هەرێم کوردستان ئەرا مانگ شوبات ئامادە بکەێد، ئەوەیش دویای هەواڵەکردن 958 مليار دينار جویر مووچەی مانگ شوبات ئەرا وەزارەت دارایی و ئابووری لە هەرێم کوردستان.
هەمیش ئەنجومەن وەزیرەیل هەرێم کوردستان، بڕیار دەسکردن وە بەشەوکردن مووچە لە سووەو دا، و لە خود وەختەگە رینمایی وە جسن وەزارەت و دەزگایەیل دریا تا لیست مووچەی مانگ ئادار وە زویترین وەخت ئامادە بکەن و ئەرا وەزارەت دارایی فیدڕاڵی کلی بکەن تا مووچەی ئی مانگە وەرجە جەژن رەمەزان بەشەو بکریەێد.
لەلای خوەییش، کەماڵ محمد وەزیر سامانەیل سروشتی وە جینشینی، راپۆرتیگ پیشکەشکر لە دانوسەنین وەرد وەزارەت نەفت فیدڕاڵی، وە بەشداریکردن کۆمپانیایل نەفت.
وەزیر رووشنایی خستە بان دەرئەنجام دانوسەنین و تەقەلایل دووارە هەناردەکردن نەفت هەرێم کوردستان وەگورەی یاسای بودجەی فیدڕاڵی.
بەیاننامەگە وتیش: تەوەر دویەم لە دانیشتنەگە ئەرا باسکردن لە دوو پێشنیار دیاری کریا کە کوێستان محمد خانمە وەزیر کار و کاروبار کۆمەڵایەتی پیشکەشی کرد، لە وەخشین خاوەن خوازینەیل تایبەت لە مەرج لیست وەرجە مارە بڕین ئەرا ئەوانەگ وەرجە ساڵ 2013 ئەو لیستە وەرگردنە، هەمیش وەخشین لە پویل ئەو قەرزەیل بویچگە کە وەرجەیە ئەرا پڕۆژەیلیگ وەرگردنە، و وەرجە تەواوکردنی مردنە.
ئەنجومەن وەزیرەیل وە گشتی رەزامەنی لەبان ئەو دوو پێشنیارە دا، و ئەرکدار وەزارەت دارایی و ئابووری و کار کریا رینمایی دەرکەن ئەرا ئاسانکاری جیوەجیکردن ئی بڕیارە.
دیاری کرد کە هەمیش باس دیاریکردن مەوقەی پشووەیل و بوونەیل فەرمی لە رووژنامەی حکومەت هەرێم کوردستان کریا، و دویای گفتوگۆکردن، حکومەت هەرێم کوردستان بڕیار ئەرکدارکردن لایەنەیل پەیوەندیدار دا وە جیوەجیکردن ریکارەیل گونجیاگ لەی باوەتە.
