حکومەت هەرێم کوردستان جویلە کەێد ئەرا خەرجکردن مووچەی ئادار و بەغدا هن شوبات سپۆنسەر کەێد

شەفەق نیوز: پێشەوا هەورامی قسەکەر حکومەت هەرێم کوردستان، ئمڕوو چوارشەممە، وت: حکومەت گشت تەقەلایلی دەێد ئەرا خەرجکردن مووچەی مانگ ئادار وەرجە هاتن جەژن رەمەزان.

هەورامی لەبان فەیسبووک نویسان: مەسروور بارزانی سەرۆک حکومەت هەرێم کوردستان لە دانیشتن شەوەکی ئمڕوور داوا کرد لیستەیل مووچەی مانگ ئادار ئامادە بکریەن و ئەرا بەغداد کلیان بکریەێد.

وتیش: مەسروور بارزانی هەمیش داوا لە وەزارەتەیل کرد لە رووژەیل پشوو فەرمی داوام بکەن تا وەرجە جەژن رەمەزان تەقەلا بیەن مووچە بەشەو بکەن.

هەرلیوا، وەزارەت دارایی و ئابووری لە هەرێم کوردستان، لە بەیاننامەیگ وت: وەزارەت دارایی فیدڕاڵی بایی (957,925,880,078) دينار عراقی خستیەسە هەژمار دارایی کوردستان لەلای لق بانک ناوەندی عراق لە هەولێر ئەرا سپۆنسەرکردن مووچەی فەرمانبەرەیل و خانەنشینەیل هەرێم کوردستان. 

وتیش: لە بنەمای رینمایی و فەرمانەیل، پەسا راپۆرت مانگانە ئامادە کریەێد لە دەی هەر مانگیگ، و لەبان ئەوە ئبرنگە ئاماژەی راپۆرت مانگ شوبات کریەێد، ئەرا دیاریکردن ریژەی شایستەیل گەنجینەی فیدڕاڵی لە داهاتەیل نەفت هەرێم کوردستان، و کلکردنی ئەرا وەزارەت دارایی فیدڕاڵی لە نزیکترین وەخت.

   بەیاننامەگە وتیش: لە رووژ پەنجشەممەو (13ی ئادار 2025)، دەسوە بەشەوکردن مووچەی فەرمانبەرەیل و خانەنشینەیل هەرێم کوردستان کریەێد، و بڕیارە لەی رووژەیل ئایندە خەرجکردن مووچە تەواو بوود.

 وەزارەت دارایی هەرێم کوردستان دووپاتیش کرد کە وەردەوامە لە تەقەلایلی وەرد گشت وەزارەتەیل و دەزگایەیل پەیوەندیدار ئەرا مسۆگەرکردن کلکردن لیست مووچەیل مانگ ئادار ئەرا وەزارەت دارایی فیدڕاڵی لەماوەی هەفتەی ئایندە، لە چوارچیوەی تەقەلایل دابینکردن مووچەی فەرمانبەرەیل لە وەخت خوەی.