تونوتیژی ژنانەی تیژ و بیوینە وەبان پیاوەیل لە هەرێم کوردستان لەماوەی دوو مانگ
شەفەق نیوز/ یەکێتی پیاوەیل هەرێم کوردستان، ئمڕوو یەکشەممە، ئاشکرا کرد، لە ماوەی دوو مانگ گوزەشتە، رێژەی تونوتیژی دژ پیاوەیل لە سەرتاسەر هەرێم بەرزەوبوین وەرچەویگ وەخوەی دیە، یەیش نشانەس ئەرا ئەوە شمارە توومارکریاگەیل فرە لە لە ساڵەیل گوزەشتە زیاترە.
سکرتێر یەکێتی پیاوەیل لە سلێمانی، بورهان عەلی فەرەج، ئەرا ئاژانس شەفەق نیوز وت: “تەنیا لە ماوەی دوو مانگ گوزەشتە 93 پەلامار تونوتیژی وەبان پیاوەیل توومار کریاس، بیجگە لە 13 خوەیکوشتن، و کوشتن چوار پیاو وە هاوکاری ژن”، وتیش: “فرەی ئەو شمارەیلە لە پارێزگای سلێمانی توومار کریانە”.
فەرەج ئاشکرا کرد کە "ئی شمارەیلە ئاڵشتکارییگ نیگەرانکەر لە سروشت تونوتیژی خیزانی و کۆمەڵایەتی لە هەرێم دەرخەن".
وتیش: هوکارە سەرەکییەیل ئی زیایبوینە چوودەو ئەرا زیایبوین کێشە خیزانییەیل کە لە ئەنجام قەیران دارایی و ئابوورییەو سەرهەڵدەێد، کە زیایبوین فشارەیل ژیان گرژییەیل ناو خیزانەیل زیاتر کرد، یەیش بویە مدوو زیایبوین تونوتیژی و خوەیکوشتن.
دووپاتیش کە "یەکێتی پیاوەیل کوردستان ئیسە کار ئەرا هوشیارکردن خەڵک لەی دیاردە کەێد" و داوا لە دەسەڵاتەیل پەیوەندیدار کرد کە ریکارەیل مقیەتیکردن وەجی بارن و پاڵپشتی خیزانە زەردمەنەیل بکەن، چ لە ری پیشکەشکردن سڵاکاری دەروینی و کۆمەڵایەتی، یا لە ری سیاسەت ئابووری کە ئەو فشارەیلە کەمەو کەن کە گاڵ کەسەیلیگ دەێد وەرەو تونوتیژی و خوەیکوشتن".
فەرەج دووپات لەوە کرد کە "ئەو شمارەیلە کە ئمساڵ توومار کریانە داوای دەسوەردان زویوەزوی کەن"، هوشداریشیدا لەوە "وەردەوامی رەوشەیل ئیسە وەبی چارەسەری ریشەیی هاتێ بوودە مدوو پەرەسەنین زیاتر دیاردەگە، یەیش کاریگ هەمەلایەنە خوازێد ئەرا چارەسەرکردن مدووەیل تونوتیژی خیزانی لە لایەنە جیاوازەیل کۆمەڵایەتی و ئابوورییەو".
تونوتیژی خیزانی لە کوردستان هەمیشە جویر دیاردەیگ تەماشا کریەێدە کە وە پلەی یەکەم کاریگەری لەبان ژن دیرێد، بەڵام ئامارەیل ئی دویاییە پەرەسەنین تونوتیژی دژوە پیاوەیل دەرخەن، یەیش ڕەنگدانەوەی ئاڵشتکاریە کۆمەڵایەتییەیلە کە گریە وە ئاڵشتبوین رەوش ئابووری و کولتوورییەو دریانە.
