"بیناکردن پیەڵ گفتوگۆ گشتگیر".. ئاشکراکردن هویردبوینی دیدارەیل سەرۆک هەرێم وەرد سەرکردەیل لە بەغداد
شەفەق نیوز/ خەیری بۆزانی سڵاکار لە سەرۆکایەتی هەرێم کوردستان، ئمڕوو دووشەممە، دووپات کرد کە سەردان نێچیروان بارزانی سەرۆک هەرێم کوردستان ئەرا بەغداد، ئامانجی بیناکردن پیەڵ گفتوگۆ گشتگیرە وەرد گشت لایەنەیل ئەرا رەسین وە چارەسەرکردن باوەتەیل گیرهاتگ، وتیش؛ سەردانەگە "نشانەیلیگ" هەڵگردگە و لە وەختیگ "گرنگ" هات.
بۆزانی ئەرا ئاژانس شەفەق نیوز وت: سینای سیاسی پڕە لە پەیام و هیمایی، و سەردان نێچیروان بارزانی سەرۆک هەرێم کوردستان گرنگی خوەی دیرێد کە نشانەیل گەورەیگ هەڵگردیە، پەیامە لە سەرتای ساڵ نوویگ پر لە سەختی تیەێد، و باوەتەیلیگ ئاڵووز خەێدە بان مێز دانوسەنین ناوەین هەولێر و بەغدا.
وتیش: ئی دیدارە تەنیا رویداویگ ئاسایی نییە لە پەیوەندییەیل ناوەین دوو حکومەت ، بەڵکم هێمای سەروشت پەیوەندیی دڕکدار ناوەین ناوەند و هەرێمە لە سای جیاوازی بەرژەوەنیەیل و ریڕەویەیل.
وتیش: دیدارەیل بارزانی وەرۆ سەرۆکایەتیەیل کۆمار و وەزیرەیل و پەرلەمان و دادوەری و دادگای فیدڕاڵی دووپات لە رەسانن پەیامیگ ئاشکرا کەێد کە ئویشێد گفتوگۆ ناوەین هەولێر و بەغدا تەنیا رییگە ئەرا چارەکردن گیچەڵەیل گیرهاتگ.
بۆزانی وتیش: سەرۆک هەرێم لە دیدارەیلی رووشنایی خستە بان باوەتەیل گیرهاتگ و دیارترینیان بودجەی فیدڕاڵی و مووچەی فەرمانبەرەیل هەرێم و میکانیزم بەشەوکردن داهاتەیل دارایی و نەفتی ناوەین هەولێر و بەغدا و چارەکردن گیچەڵ مەرزەیل سنووری بیجگە مادەی ١٤٠ لە دەستوور.
دیاری کرد کە سەردان بارزانی لە سای گەشەیل هەرێمی و ناودەوڵەتی تیەێد کە گرنگی گفتوگۆی ناوخوەیی لە عراق دیاری کەن، کە کەفێدە روی سەختیەیل بەرزیگ لە دەورگرد هەرێمیی، و یانە عراق خەنە نوای دوو هەڵوژین: یا بەرەی ناوی وە هەماهەنگی ناوەین پیکاتەیلی قایم بکەێد، یا وەردەوام بوود لە چویچیان کە هیلێد زیاتر بکەفێدە کاریگەری دەرەکی.
سڵاکار سەرۆکایەتی هەرێم کوردستان دووپات کرد کە سەرکەفتن ئی سەردانە پشت وە توانای دوو لایەن بەسێد ئەرا وازهاوردن وتار سیاسی تەقلیدی، و چگن وەرەو جیوەجیکردن راسیانەی رێککەفتنەیل، کە هاوڵاتی لە هەرێم کوردستان چەوەڕی بەیاننامەیل سیاسی نوو نییە، بەڵکم چارەسەری دیاریگ خوازێد مافەیل سەرەکیی مسۆگەر بکەن، جویر خەرجکردن مووچەیل و دابینکردن خزمەتگوزاریەیل.
