30 تریلیۆن ئەرا مووچە.. داهاتەیل عراق 35.9 تریلیۆن دینار توومار کەێد تا حوزەیران گوزەشتە
شەفەق نیوز ـ بەغدا
داتایەیل وەزارەت دارایی تایبەت وە جیوەجیکردن بودجەی فیدراڵی تا کۆتایی مانگ حوزەیران/يونيوی گوزەشتە دەرخست کە کوو گشت داهاتەیل عراق رەسیە 35.946 تریلیۆن دینار، لە وەختیگ داهاتەیل نەفتی داوەزی لە باڵادەسی ئەرا سەرچەوەیل دەوڵەت، چوینکە نزیکەی 80% لە کوو گشتی داهاتەیل پێکهات.
وەپای داتایەیل، کە ئاژانس شەفەق نیوز ئاگاداری بوی، داهاتەیل نەفت رەسیە 28.433 تریلیۆن دینار، وەرانوەر نزیکەی 7.513 تریلیۆن دینار داهات نا نەفت، کە یەکسانە وە نزیکەی 20% لە کوو گشتی داهاتەیل.
لایەن خەرجییەیل، داتایەیل دەرخست کە بڕ گشتی خەرجیەیل رەسیە 54.673 تریلیۆن دینار، کە 50.592 تریلیۆن دینار خەرجی وەردەوامە، لە وەختیگ خزمەت قەرز رەسیە 3.992 تریلیۆن دینار، و خەرجییە سەرمایەییەیل نزیکەی 15.972 ملیار دینار.
قەرەبوو کردن فەرمانبەرییەیل (مووچە) لە نوای بڕگەیل خەرجی هات وە بڕ 30.769 تریلیۆن دینار، و لە دویای ئەو چەودێری کۆمەڵایەتی وە نزیکەی 13.858 تریلیۆن دینار، دویایش بەخش و دەسمیەتی و سوود و خەرجیەیل ترەک وە بڕ 4.150 تریلیۆن دینار، 1.657 تریلیۆن دینار ئەرا کاڵایییەیل هەوەجە و 122.8 ملیار دینار هەوەجەیل خزمەتگوزارییەیل.
و لە بودجەی وەبەرهێنان، کوو گشتی خەرجی رەسیە 2.513 تریلیۆن دینار، بەرنامەی وەبەرهێنان دەسگرد وەبان 1.634 تریلیۆن دینار، و لە دویای ئەو ئەوزەڵداین هەرێمەیل وە 758.9 ملیار دینار، و پرووژەیل پترۆدۆلار وە 86.7 ملیار دینار.
باوجی وەپای کەرتەیل، کەرت باڵەخانە و خزمەتگوزارییەیل دەسگرد وەبان باڵاترین خەرجی وەبەرهێنان وە بڕ 1.188 تریلیۆن دینار، و لە دویای ئەو کەرت پیشەسازی وە 869.8 ملیار دینار، دویایش کەرت گواستنەوە و پەیوەنییەیل وە 332.9 ملیار دینار، و کەرت پەروەردە و فێرکاری وە 105.5 ملیار دینار، لە وەختیگ تەرخانکریاگ کەرت کشاوەرزی رەسیە نزیکەی 16.8 ملیار دینار.
داتایەیل نیشان دەن کە کوو گشتی خەرجی زیاتربوی لە داهاتەیل وە نزیکەی 18.727 تریلیۆن دینار تا کۆتایی حوزەیران، کە ئەوەیش رەنگەودان وەردەوام فراوانبوین جیاوازییە لە ناوەین سەرچەوەیل دەوڵەت و قەبارەی خەرجی گشتی.
