وێستگەیل "ئۆنلاین" ئەرا چەودیاریکردن پیسی وا لە بەغداد
شەفەق نیوز - بەغداد
جەواد جبوری بریکار هونەری وەزارەت ژینگە، رووژ شەممە، دووپات کرد کە وەزارەتەگە لە ئیسە وێستگەیل چەودیاریکردن پیسی وا وە شیوەی "ئۆنلاین" لە بەغدای پایتەخت دیرێد، وە دەسنشانکردن ئەرا کارکردن لەبان فراوانکردن پرۆژەی چەودیاریکردن کوالێتی هەوا تا گشت پارێزگا عراقییەیل بگرێدەو.
جبوری ئەرا ئاژانس شەفەق نیوز وت، کە وەزارەتەگە لە ئیسە کار لەبان چەودیاریکردن پیسی وا لە بەغدای پایتەخت کەێد، و داوەزینیگ لە ئاستەیل پیسیوا وەخوەمان دیمنە.
وتیش کە وەزارەتەگە دەسەڵاتەیل چەودیاریکردن دیرێد لەبان ئەو لایەنەیلە کە بۊنەسە مدوو پیسبۊن ژینگەیی، وەپەی یاسایەیل کارپیکریاگ، و کار کەێد لەبان وەدۊاداچگن پیسبۊن و چەودیاریکردنیان لە بەغداد و پارێزگایەیل.
جی باسە کە فرەیگ لە ناوچەیل بەغداد لە پیسی وا ناڵن، وەتایبەت لە ماوەی وەرز تاوسان، لەناو توومەتبارکردن وەزارەت ژینگە وە نەکردنە خەسی چەودیاریکردن لەبان سەرچەوەیل پیسبۊن.
روانگەی "عراق سەوز" کە تایبەتمەنە وە کاروبار ژینگەیی، لە وەختیگ گوزەشتە ئاشکرا کردۊد، لەباوەت سستی چەودیاری ژینگەیی لەبان چاڵاکییە پیشەسازی و وەبەرهاورەیل لە بەغدای پایتەخت، وە دەسنشانکردن ئەرا ئەوە کە ئەوانە بۊنەسە مدوو بەرزەوبۊن ئاستەیل پیسی لە بڕیگ لە ناوچەیلی.
