هەواڵگری عراقی حەشارگەیگ داعش و 185 ئەمار تەقەمەنی پەیا کەێد

هەواڵگری عراقی حەشارگەیگ داعش و 185 ئەمار تەقەمەنی پەیا کەێد
2026-11-16T08:54:54+00:00

شەفەق نیوز- بەغداد

وەڕێوەبەرایەتی هەواڵگری سەربازی سەر وە وەزارەت وەرگری عراق، ئمڕوو دووشەممە،  پەیاکردن حەشارگەیگ لۆجستی لە ژیر زەوی و 185 ئەمار تەقەمەنی لە وەجیماگەیل رێکخریاگ داعش راگەیان، لە ماوەی دوو ئۆپەراسیۆن ئەمنی جیاواز لە پارێزگایەیل سەڵاحەدین و نەینەوا.

وەڕێوەبەرایەتیەگە لە بەیاننامەیگ  رەسیدە ئاژانس شەفەق نیوز وت: "مەفرەزەیل هەردوگ ئۆپەراسیۆنەگە وە هەماهەنگی وەگەرد بەشەیل هەواڵگری و ئاسایش لە تیپەل پیادەی شانزەهەم و بیست و یەکەم جیوەجی کردن، وەپشتبەسانن وە زانیارییەیل هەواڵگری و وەدویاچگن مەیدانی".

ئاشکرا کرد  هێزیگ لە تیپ پیادەی بیست و یەکەم، لە چوارچمگ کەرت ئۆپەراسیۆنەیل سەڵاحەدین، حەشارگەیگ کوینە و شاریاگ لە ژیر زەوی پەیا کرد کە ماددە و هەوەجەیل لۆجستی سەر وە رێکخریاگەگە لە ناوی بۊ، و دیاری کرد، ناوڕۆک  شوینەگە وە لایەن مەفرەزەیل ئەندازەی مەیدانییەو لەناو بریا.

دیاری کرد، بەش هەواڵگری و ئاسایش لە فیرقەی پیادەی شانزەهەم، لە ماوەی ئۆپەراسیۆنیگ ترەک لە کەرت ئۆپەراسیۆنەیل نەینەوا، دەس گردن لە بان 185 ئەمار تەقەمەنی لە عەیار 14.5 ملم، لە وەجیماگەیل رێکخریاگەگە، و هەڵگردنیان ئەرا ئامادەکاری وەرگردن رەزامەنییە یاساییە هەوەجەیل ئەرا تەقاننیان.

Shafaq Live
Shafaq Live