"هەڕەشەی رخبەریگ".. دەزگایگ هوشداری دەێد: توركيا لە بنەمای هاوردە وەرانوەر ئاو رەفتار کەێد
شەفەق نيوز/ مەنار عوبەیدی سەرۆک دەزگای "عراق بانان"، ئمڕوو یەکشەممە، وت: تورکیا وەگەرد عراق وەگورەی هاوردەکردن وەرانوەر ئاو رەفتار کەێد، و هوشداری دا لەو هەڕەشەی رخدارە وەبان کشتوکاڵی و سامان ئاژەیل و پیشەسازی.
عوبەیدی لە پۆستیگ لەبان فەیسبوک کە ئاژانس شەفەق نیوز چەودیاریی کرد، نویسان کە گۆرسال باران سەرۆک ژویر بازرگانی ئەنقەرەی تورکیا ئاشکرای ئامانجیگ هاوبەش ناوەین حکومەت عراق و تورکیا کرد ئەرا بەرزکردن بڕ بازرگانی ناوەین دوو وڵات ئەرا 30 مليار دۆلار، وەمەرجیگ هەناردەیل تورکیا ئەراک عراق بڕەسێدە 90% زیاتر لەی شمارە.
وتیش: هەرچەن ئەو وتارە ئاشکرای وەخت و شوین ئەو ڕێککەفتنە نەکرد، نەیش ئەو لایەن عراقیە کە لە دیاریکردن ئی ئامانجە بەشداری کرد، وەلێ نشانەیل دیار دەن کە تورکیە بازاڕ عراق وە شوینیگ ستراتیژی ئەرا فرووشتن بەرهەمەیلی داناس.
وتیش: دیارە ئەنقەرە تەقەلا دەێد بەشە گەورەگە لە هەناردەیل ئیران و ئیمارات وەرەو عراق بوەێد، و شایەت کار کەێد ئەرا سنووردارکردن هەر تەقەلایگ نیشتمانی عراقی ئەرا پاڵپشتیکردن بەرهەم ناوخوەیی یا گەشەپیدان کەرتەیل کشتوکاڵی و پیشەسازی،، کە شایەت بوونە ریگر لەناوی جیوەجیکردن ئەو پلانە.
عوبەیدی وتیش: لە سای ئی هویرکردنە، ئەو دروشم کوینە (نەفت وەرانەور ئاو) کە وە درویژایی ساڵەیلیگ ژنەفتیمنەی، و راسییگ نوو وەناونیشان (هاوردە وەرانوەر ئاو)".
هوشداری دا کە هاوردەیل عراق هەرچەنیگ لە تورکیا زیایەو بوود، هاتێ دەرفەتەیل وەرگردن تەکان ئاویگ زیاتر لە تورکیاو وە دەسی بکەفێد، و ئی هاوکیشە هەڕەشەی رخداریگ ئەرا کشتوکاڵی و سامان ئاژەڵ و پیشەسازی هەڵگرێد، کە ئابووری عراق کەفێدە کەس خوازین لایەنیگ دەرەکی.
عوبەیدی دووپاتیش کرد کە وەیەوە عراق کەفێدە نوای دوو ری، خاستریان تاڵە، یا واز لە بەشیک لە ئاو خوەی بارێد، کە ری وەوە نییە، یا وەردەوام بوود لە هاوردەکردن لە تورکیا وە ریژەیگ هاتێ بڕەسێد تا 30 ملیار دۆلار لە ساڵیگ، وە ئومید ئەوە کە تورکیا کلکردن ئاو خاسترەو بکەێد.
لە کۆتایی وتیش: ئومید لە حکومەت عراق خوازیمن، ئەو وتارە لەلایەن سەرۆک ژویر بازرگانی ئەنقەرە وە وەناڕاس ئاشکرا بکەێد، یا وەشیوەیگ فەرمی ئی رێککەفتنە ئاشکرا بکەێد، و دیاری بکەێد چوین هاوسەنگی بازرگانییگ وەجی بارێد مقیەتی لە بەرژەوەنی عراق بکەێد، لە جیای زەرەداین کەرتەیل بەرهەمکاریی و سەروەخوەیی ئابووریی.
