هێزە ئەمنییەیل دەس کەن وە وازکردن بارەگای کۆنترۆڵکەر لە ناوچەی جوڕف سەخەر لە بابل
شەفەق نیوز - بابل
هێزە ئەمنییەيل، شەوەکی ئمڕوو جمعە، دەس کردن وە کار کردەیی ئەرا وازکردن بارەگای کۆنترۆڵکەر لە ناوچەی جوڕف سەخەر (نەسڕ) لە باکوور پارێزگای بابل، وەپەی فەرمان دیوانی دەرچگ لە سەرۆک ئەنجومەن وەزیرەیل و فەرماندەی گشتی هێزە چەکدارەیل عەلی فالح زەیدی.
لە چوارچيوەی ئی جۊلەیل، پيشڕەوەیلیگ لە هێزەیل پۆلیس فیدراڵی، کە کاروانەیل سەربازی لەخوەی گرێد، رەسینە جوڕف نەسڕ لە ئامادەکارییگ ئەرا چگنە ناو ناوەندەگەی.
زەیدی، دۊکە پەنجشەممە، فەرمانیگ دیوانی دەرکردۊد وە دروسکردن بارەگای کۆنترۆڵکەر لە ناوچەگە، هاووەخت وەرد رێنمایییگ وە چگن گشت کەرتە سەربازییەیل وە جیاوازی پێکهاتەیلیان ئەرا ئامادەباشی "ج"، و هەڵوەشانن مووڵەت کارمەنەیل تا ئاگادارکردنیگ ترەک.
فەرمانە دیوانییەگە بڕیار دەێد وە چەسپانن بارەگای کۆنترۆڵکەر وە سەرکردایەتی هێزەیل پۆلیس فیدراڵی لە گشت لایەنەیلەو، و ئەرکدارکردم فەریق روکن ئەحمەد حاتەم حەمید وە سەرکردایەتیکردنی، وە دەسمیەتی دوو جیگر کە ئەوانیش: لیوا روکن حوسەین عەلی نسەیف ئەرا کاروبار وەرگری، و عودەی عەبدولئەئیمە مەسحەب ئەرا کاروبار حەشد شەعبی.
لەژیر فەرمان بارەگاگە چوار پێکهاتەی سەرەکی کار کەن، کە لیوایگ لە سوپای عراقی، و لیوایگ لە پۆلیس فیدراڵی، و دوو لیوا لە دەسەی حەشد شەعبی لەخوەی گرێد، بیجگە لە فەوجیگ لە پۆلیس وزە کە وەرپرسیارییەتی پاراستن لۊلە نەفتییەیل لە ناوچەگە گرێدە دەس.
فەرمانەگە سەعات شەش شەوەکی ئمڕوو جمعە (20 تشرین دۊەم/ نۆڤەمبەر) وە وادەی وازکردن بارەگاگە دیاری کرد، تا سەرکردایەتی و کۆنترۆڵ تەواوەتی لەبان گشت کەرتە ئەمنییەیل لەناو سنوورەیل کارگێڕی جوڕف نەسڕ بگرێدە مل، وەرد پابەندکردنی وە بەرزترین ئاستەیل هەماهەنگی وەرد سەرکردایەتییەیل پۆلیس بابل، و ئۆپەراسیۆنەیل کەربەلا، و ئۆپەراسیۆنەیل ئەنبار، و ئۆپەراسیۆنەیل بەغداد.
ئی جۊلە حکومەتییەیلە تیەن ئەرا دووارە رێکخستن دۆسیەی ئەمنی لە جوڕف نەسڕ و کۆتاییهاوردن وە تیکەڵبۊن کارگێڕی، دۊای لێکۆڵینەوەیل حکومەتی لەباوەت زیایچگەیل و گومانەیل قاچاخچێتی نەفت و بەرهەمەیلی؛ وەختیگ نویسینگەی فەرماندەی گشتی بڕیار دا وە چەسپانن پۆلیس وزە وە پاراستن کڕ گواستنەوەگە، و ئاڵشتکردن ئەو هێزە کە زەۊەگە گردگە، و رەوانەکردن ئەو لێکۆڵینەوەیلە کە پەیوەندی وە زیایچگنەیل دیرن ئەرا دادگا.