لای خوەیانەو تەرم مناڵیگە.. پەیاکردن پیچیاییگ جادوو لە چەم دجلە لە سەڵاحەدین

شەفەق نیوز - سەڵاحەدین

سەرچەوەیگ ناوخۆیی لە پارێزگای سەڵاحەدین، رووژ جمعە، خەوەر دا کە دانیشتگەیل ناحیەی یەسرب، کە کەفێدە باشوور پارێزگاگە، تەنیگ نامۆ پەیا کردن کە لەبان روی ئاو چەم دجلە کەفتۊدە بان ئاو، و لە سەرەتای کارەگە لەلای خوەیانەو کە تەرم مناڵیگە فڕە دریاگەسە ناو چەمەگە.

سەرچەوەگە ئەرا ئاژانس شەفەق نیوز وت، کە دانیشتگەیل دەسمیەتی لە یەکیگ لە راوچییەیل ئامادەبۊ لە ناوچەگە وەرگردن ئەرا کیشانن تەنە سەرئاوکەفتگەگە و دەرهاوردنی لە ئاوەگە، کە نریا ناو بەلەمیگ و ئەرا کەنار چەمەگە بریا، ئەرا دڵنیابۊن لەلی.

دیاری کرد کە دۊای وازکردن تەنە نامۆگە، دەرکەفت کە بریتییە لە شەۊییگ ژنانە کە وە پارچە پەڕوویگ پیچیاگ، و نۊساگەیل و تەڵەسم لەخوەی گرێد کە بڕوا کریەێد پەیوەندی وە کارەیل جادوو داشتوود، لە شان ئایەتەیل قورئانی کە لەبانی نۊسیاگە.