فرووشەیل ناوەندی عراقی لە دراو بیگانە 20% لە تەمموز کەمەو بوود

شەفەق نیوز- بەغداد

فرووشەیل بانک ناوەندی عراقی لە دراو بیگانە ماوە3 مانگ تەمموز 2026 ئەرا 5.662 ملیار دۆلار کەمەو بۊە، وە کەمەوبۊنیگ وە بڕ نزیکەی 195 ملیۆن دۆلار، و وە ریژەی 3.3% وەراورد وە مانگ حوزەیران، کە فرووشەیل لەناوی رەسیە 5.857 ملیار دۆلار.

 وەپای داتایەیل بانک ناوەندی عراقی، کە ئاژانس شەفەق نیوز چەوی وەپی کەفت، فرووشەیل تەمموز 2026 بەشەو بۊە ناوەین 295 ملیۆن دۆلار ئەرا فرووشەیل کاش، و 5.367 ملیار دۆلار ئەرا قایمکردن بنەمایەی بانکەیل لە دەیشت پەنجەرەی فرووشتن دراو بیگانە.

 لە بنەمای ساڵانە، داتایەیل کەمەوبۊنیگ گەوراتر نیشان دان، کە فرووشەیل تەمموز 2026 وە ریژەی 20% وەراورد وە تەمموز 2025 کەمەو بۊن، وەختیگ رەسیە 7.081 ملیار دۆلار، وە کەمەوبۊنیگ وە بڕ نزیکەی 1.419 ملیار دۆلار.

هەمیش فرووشەیل کاش لە تەمموز 2026 وە ریژەی 31.7% لە بنەمای ساڵانە بەرزەو بۊ، لە 224 ملیۆن دۆلار لە تەمموز 2025 ئەرا 295 ملیۆن دۆلار، لە وەختیگ فرووشەیل قایمکردن بنەمایەی بانکەیل لە 6.857 ملیار دۆلارەو ئەرا 5.367 ملیار دۆلار داوەزیا، وە کەمەوبۊنیگ وە ریژەی نزیکەی 21.7%.

بڕ گشتی فرووشەیل بانک ناوەندی ماوەی هەفت مانگ یەکەم لە ساڵ 2026 رەسیە نزیکەی 31.574 ملیار دۆلار، وەراورد وە 47.985 ملیار دۆلار لە خود ماوەگە لە ساڵ 2025، وە داوەزیانیگ کە رەسیە نزیکەی 16.411 ملیار دۆلار، و وە ریژەی 34.2%.