سوريا ئەرا شەفەق نيوز دووپات لە پابەندبوینی وە زیایکردن مەرەقەزکردن تاقە ئاوەیل ئەرا عراق کەێد
شەفەق نيوز ــ سوريا
ئەندازیار ئەحمەد کەوان وەڕیەوبەر دەزگای سەرچەوەیل ئاو سوریا، ئمڕوو شەممە، دووپات کرد کە وڵاتەگەی پابەندە وە کلکردن تاقەبەش ئاو عراق لە چەم فوراتەو، وەگورەی ئەو رێککەفتنە ناوەین لایەنەیل پەیوەندیدار، وتیش: تاقاوەگەی عراق وە ریژەی ساڵانەیگ کلکریەێد کە رەسێدە 58% لە چەم فورات لەبان سنوور سوریا و تورکیا.
کەوان لە قسەیل تایبەت ئەرا ئاژانس شەفەق نیوز دیاری کرد کە لایەن تورکیا پەیمان دا وەگورەی رێککەفتن واژووکریاگ، ریژەی ساڵانەی زیاتر لە 500 متر شەشپاڵوو لە چرکەیگ لەبان سنوور سوریا و تورکیا مەرەقەز بکەێد، و ئەگەر تەکان مانگانە لەیە کەمترەو بوی، تورکیا پابەندە وە پڕەوکردن ئی کەمیە لە مانگ پشتی.
دیاری کرد کە تاقەبەش عراق لە ناوچەی بوکەمالەو رەد بوود، و بەش وەختانەی سوریا بوو ئاوە کە لە تورکیاو تیەێد رەسێدە 42%.
وتیش: دەسەیگ هاوبەش ناوەین عراق و سوریا دروس کریا ئەرا پەیمانەکردن تەکان ئاو لە چەم فورات لە بوکەمال، و بڕیارە ناوەند پەیمانەکردن نوویگ لەبان سنوور سوریا و عراق دروس بکریەێد.
دیاری کرد کە ئی ریکارەیلە لە چوارچیوەی هاوکاری هاوبەش ناوەین دوو وڵات تیەێد ئەرا مسۆگەرکردن یەکسانی لە بەشەوکردن ئاو و نواگیریکردن سەختیەیل داوەزیان ئاست چەمەگە.
رووژ چوارشەممەی گوزەشتە، محمد شیاع سودانی سەرۆک وەزیرەیل عراق، رەزامەنی تورکیا و سوریا لەبان زیایکردن مەرەقەزکردن تاقە ئاوەیل ئەرا عراق راگەیان.
عراق یەکیگە لەو پەنج دەوڵەتە کە فرەترین زەردمەنن لە ئاڵشتبوین کەشوهەوا وەگورەی راپۆرتەیل نەتەوە یەکگرتگەیل و ریخریاگەیل ناودەوڵەتی پەیوەندیدار.
