سودانی: ئیسرائيل خوازێد نەخشەی نوویگ ئەرا خوەرھەڵات ناوڕاس بکیشێد
شەفەق نيوز/ محمد شیاع سودانی سەرۆک وەزیرەیل عراق، ئمڕوو دووشەممە، وت: ئیسرائیل خوازێد شوین جەنگەگە لە ناوچەگە فراوانەو بکەێد، ئەرا کیشان نەخشەی نوویگ ئەرا خوەرھەڵات ناوڕاس، دووپاتیش کرد کە ئیران ماف خوەیە وەگورەی یاسایەیل نەتەوە یەکگرتگەیل وەرگری لە خوەی بکەێد.
ئەوەیش لەناو پیشوازیکردنی لە بڕیگ سەرۆک کلکریاگەیل دیبلۆماسی ئەرا دەوڵەتەیل ئاسیایی و دوو ئەمریکا کە لەناو عراق کار کەن، هەمیش باڵیوزەیل هەر لە ئوسترالیا و تورکیا، وەگورەی بەیاننامەیگ لەلایەن نویسنگەی راگەیاننی کە رەسیە ئاژانس شەفەق نیوز.
سودانی وتیش: حکومەت داگیرکاری سەهیۆنی وەژیر یاسایەیل ناودەوڵەتی و مرۆیی نیەچوود، و تاوانەیل و کوشتارەیل لە 7 ئۆکتۆبەرەو جیوەجی کەێد، و کۆمەڵگای ناودەوڵەتی کە وەرپرسیاریەتی مقیەتیکردن ئاشتی و ئاسایش کەفێدە گەردنی شکست هاورد.
دیاری کرد کە عراق گاڵ کۆمەڵگای ناودەوڵەتی دەێد ئەرک خوەی جیوەجی بکەێد لە وسانن ئی دوژمنایەتییە و پشت وە چارەسەری ئاشتیانە بوەسێد وە گلەوداین دانوسەنین، دووپاتیش کرد کە عراق تەقەلایل گەورەیگ دا ئەرا وسانن دوژمنایەتی وە پەیوەندیکردن فرەیگ وەرد سەرکردە و وەزیرەیل دەیشت دەوڵەتەیل جیهان.
سودانی باس هاوکاری تەواو وەرد ئیران کرد کە دەوڵەتیگ هەرێمی گرنگە و خاوەن سەروەریە، و ئەندامە لە کۆمەڵگای ناودەوڵەتی، و شەرمەزار دوژمنایەتیی سەهیۆنی لەباتی کرد، چوینکە هەڕەشەس ئەرا ئاسایش و ئاشتی، و ئارامی و ئاسایش عراق.
سەرۆک وەزیرەیل عراق وتیش: شکانن یاسایەیل وەلایەن ئی قەوارە وەیجویرە دەرئەنجامەیل بەدیگ لەلی کەفێدەو، دووپاتیش لە رازینەوین وە هەر شکاننیگ ئەرا سەروەری عراق کرد، کە وە پیشکەشکردن سکاڵای فەرمی ئەرا دەزگایەیل ناودەوڵەتی و نەتەوەیی نشان دریا.
