سنوور عراق - سوریا ئارامە و لاوردن سەنگەرەیل خوەڵین راس نییە
شەفەق نيوز – بەغداد
فەرماندەیی هیزەیل سنوور عراق، ئمڕوو شەممە، راگەیان کە ئەو پارچە ڤیدیۆ کە لەبان سۆشیال میدیا بڵاو بویە، کە نشان دەێد گوایە شۆفەل پەسا سەنگەرەیل خوەڵین لەبان سنوور وەرد سوریا لاوەن راس نییە.
فەرماندەییەگە لە بەیاننامەیگ رەسیە ئاژانس شەفەق نیوز وت: ئەو پارچە ڤیدیۆ هەن لاوردن سەنگەرەیل خوەڵین ناو خاک سوریا بویە، کە لە پارێزگای حەڵەب بویە و هیچ پەیوەندییگ وە سنوور عراق و سوریا نەیرێد.
دووپاتیش کرد کە سنوور عراق و سوریا ئارامی ئەمنی وەخوەی دوینێد، و قەڵغانی گەورەیگ و سیستەم چەودیاریکردن نوو دیرێد، بیجگە چەودیاریکردن وەردەوام لە گشت وەختیگ لەلایەن هیزە ئەمنییەیل.
فەرماندەییەگە داوا لە ماڵپەڕەیل سۆشیال میدیا و بڵاوکەرەیل کرد بکەفنە مینەی بندروس خەوەرەیل، و پشت وە سەرچەوەیل فەرمی بوەسن لە هاوردن خەوەرەیل، و هوشداری دا لە جیوەجیکردن ریکارەیل یاسایی وەرانوەر ئەو کەسەیلە کە خەوەرەیل دروو یا زانیاریەیل گومانی بڵاو کەن.
