زەیدان: عراق پاڵپشتی ئیران لە یاد نیەوەێد و هاوپشتی وەگەردی کەێد لە رویوەڕویبوین دەسدریژی
شەفەق نیوز- تاران
فایەق زەیدان، سەرۆک ئەنجومەن باڵای دادوەری لە عراق، ئمڕوو سێشەممە، دووپات لە هاوپشتی وڵاتەگەی وەگەرد ئیران چۊ حکومەت و گەل کرد لە رویوەڕویبوین "دەسدریژی تاوانکاری ئەمریکی و ئیسرائیلی"، و جەخت کردە بان ئەوەگ عراق "هیچ وەخت لە یاد نیەوەێد" پاڵپشتی ئیران ئەرای لە جەنگ دژ وە تیرۆر.
ئاژانس "تەسنیم" ئیرانی خەوەردا، کە زەیدان وتگە، مەوقەی دیاریکردنی وەگەرد غوڵام حسێن موحسینی ئێژەیی سەرۆک دەسەڵات دادوەری ئیرانی لە تاران، کە عراق شەرمەزار "تیرۆر ئابووری" دژ وە ئیران کەێد، و لە خود وەخت دووپات کرد لەبان هەوەجەی جیوەجیکردن تەواو رێککەفتنە دادوەرییە ئیمزاکریاگەیل ناوەین هەردوگ وڵاتەگە.
زەیدان هەمیش وت: "هیچ وەخت پاڵپشتی ئیران ئەرا عراق لە هۊر نیەوەیمن، چ لە ساڵ 2003 بوود یا لە رووژەیل قەیران تیرۆر"، و دووپات لە هاوپشتی عراق وەگەرد ئیران کرد لەو دۆسیە کە وەسفی کرد وە دەسدریژی ئەمریکی و ئیسرائیلی لەبانی.
لە لای خوەییشەو، ئیژەیی وت کە هەماهەنگی ناوەین ئیران و عراق "قۊلەو بۊە لە گشت بوار و رەهەندەیل"، وتی کە پەیوەندییە دادوەری و یاساییەیل ناوەین هەردوگ وڵاتەگە وەرەونوا چگنە و فراوان بۊنە لە سای یاداشتەیل لەیەکفامستن و رێککەفتنە ئیمزاکریاگەیل ناوەین هەردوگ لا.
لە دیداریگ ترەک، کە زەسدان وەگەرد ئەمیندار ئەنجومەن باڵای ئاسایش نەتەوەیی ئیرانی لیوا موحسین رەزایی ئەنجامی دا، دووپات لەبان هەوەجەی هەماهەنگی هەرێمی و دابینکردن ئاسایش لەبان سنوورە هاوبەشەیل ناوەین عراق و ئیران کرد، و رێز خوەی نیشان دا ئەرا ئەو پاڵپشتییە کە کۆمار ئیسلامی ئیرانی پیشکەشی کەێد.
هەمیش زیەدان سڵاو وەرپرسەیل عراقی ئەرا سەرکردەی شووڕش ئیسلامی رەسان، و یاد قاسم سولەیمانی و ئەبو مەهدی موهەندیس کردەو، وەپای ئەوەگ "تەسنیم" خەوەر داگە.
لەلای خوەییشەو، رەزایی وت کە کۆمار ئیسلامی ئیرانی عراقیگ "سەروەخوەی و هازدار" خوازێد، و هەمیش وت کە وڵاتەیل ناوچەگە خوەیان بڕیار ئەرا بانان خوەیان دەن، و ویلایەتە یەکگرتگەیل "هیچ جییگ لە بانان ناوچەگە نیەدیرێد".
رەزایی باس هەوەجەی دیاریکردن چارەنویس "گرووپەیل دژ وە ئیران کە لەبان سنوورەیل هەردوگ وڵاتەگە هان".
شەوەکی ئمڕوو، زەیدان رەسیە تاران پایتەخت ئیران، وە سەرۆکایەتی شاندیگ دادوەری باڵا، لەبان مکیسیگ فەرمی، ئەرا باسکردن لە شمارەیگ لە دۆسیەیل هاوبەش.
شاندە عراقییەگە سەرۆک دەسەی سەرپەرشتی دادوەری، و سەرۆک دەزگای داواکاری گشتی، و وەڕێوەبەر گشتی فەرمانگەی پاسەوانی دادوەری لەخوەی گرد، لە وەختیگ یاریدەدەر سەرۆک دەسەڵات دادوەری لە کاروبار ناودەوڵەتی و ئەمیندار دەسەی مافەیل مرۆڤ لە دادوەری ئیرانی ناسر سیراج لە پیشوازیی بۊ.
زەیدان سەردانیگ لەی شیوە هەفتەی گوزەشتە ئەرا سعودیە ئەنجام داۊد، کە لەناوی باس لە هەماهەنگی دادوەری وەگەرد وەرپرسەیل لە ریاز کردۊد.
