زیاتر لە 800 رووژنامەنویس و 600 ریخریاگ راگەیانن بەشداری لە رووماڵکردن دەسەیل عاشورا لە کەربەلا کردنە
شەفەق نیوز - کەربەلا
حسێن ئەلشەمەری، وەرپرس لق کەربەلا لە سەندیکای رووژنامەنویسەیل، ئمڕوو یەکشەممە وت: شمارەی ئەو دەزگایەیل راگەیاننو کە بەشدارن لە رووماڵکردن رسوومەیل موحەڕەم، لە ئاڵشتکردن ئاڵای ئیمام حسێنەو تا دەهەمین رووژ موحەڕەم، ٦٠٠ کەس رەد کرد، یەیش یەکیگە لە فراوانترین رووماڵە میدیاییەیل کە شارە پیرووزەگە وەخوەی دیە.
لە بەیاننامەیگ رەسیە ئاژانس شەفەق نیوز شەمەری وت: "دەزگایەیل راگەیانن بریتی بوین لە ئاژانسەیل هەواڵ، رووژنامە، کەناڵە مانگە دەسکردەیل، دروسکەرەیل باوەت ئامانجدار، و فۆتۆگرافەرە پیشەگەرەیل جویراجویر وڵاتەیل جیهان".
دیاری کرد کە"ئیسە زیاتر لە 30 یەکەی پەخش زنە جیگیر و جویلەکەر کارەکەن ئەرا پەخشکردن رویداوەیل ئەو بوونە ئەرا مەردم لە ناو و دەیشت عراق".
وتیش: "شمارەی رووژنامەنویسەیل بەشداربوی لە رووماڵکردنەگە ٨٠٠ کەس زیاتر بوی، کە ئەرا دەزگایەیل راگەیانن ناوخۆیی و عەرەبی و ناودەوڵەتی کارکەن، یەیش رەنگدانەوەی گرنگی گەورەی ئایینی و میدیایی ئی بوونەس".
هەمیش وت: "ئەو دوو مەزارگەی پیرووزە ئاسانکارییگ وەرچەو ئەرا میدیایەیل پیشکەش کردنە، لەوانە خزمەتگوزاری ئینتەرنێت، خوەراک، و سەکوو تایبەت ئەرا ئەنجامدان چەوپیکەفتن رووژنامەوانی، و نیشانەی فەرمی دەرکردنە ئەرا ئاسانکاری ئەرا جویلەی رووژنامەنویسەیل لە دەورگرد شارە کوینەگە".
لە کۆتایی، شەمەری دەسخوەشی لە "رەنجەیل دەزگا ئەمنییەیل کرد ئەرا دابینکردن ژینگەیگ بیوەی و ئارام ئەرا رووژنامەنویسەیل کە لەی رووژە لە کەربەلا کارکەن".
