گردەوبوینیگ ئەمنی ئاست بەرز لەناوەین پیشمەرگە و هیزەیل فیدراڵی لە بەغداد
شەفەق نیوز- بەغداد
بەغدای پایتەخت، رووژ یەکشەممە، میوانداری گردەوبوینیگ ئەمنی ئاست بەرز لەناوەین هیزەیل فیدراڵی و پیشمەرگە کرد، ئەرا باسکردن لەبان پەرەپیداین هەماهەنگی هاوبەش و دووسایەتی، بیجگە لە ئاسایش ناوچەیل جی گرنگی و پاراستن وەیەکەوژیان لە سنوورەیل هاوبەش لەناوەین هەرێم کوردستان و ناوچە فیدراڵییەیل، تا بوودە پیەڵیگ قایم لەناوەینیان.
راگەیانن وەزارەت پیشمەرگە لە بەیاننامەیگ رەسیە ئاژانس شەفەق نیوز خەوەردا، کە دیدارەگە وە ئامادەبۊن وەڕێوەبەر نووسینگەی سەربازی تایبەت ئەرا فەرماندەی گشتی هیزە چەکدارەیل فەریق یەکەم روکن عەبدولئەمیر شەمەری، سەرۆک ئەرکان وەزارەت پیشمەرگە فەریق روکن عیسا عوزێر ساز کریا، وە ئامانج قایمکردن و پەرەپیداین هاوکاری و هەماهەنگی لەناوەین هیزە ئەمنییەیل عراقی و هیزەیل پیشمەرگە وە شیوەیگ هونەرمەن و رێکخریاگ.
بەشداری لە دیدارەگە لەلایەن سەرۆک دەزگای دژە تیرۆر، سەرۆک دەسەی دەروازە سنوورییەیل، وەرپرس هەواڵگری وەزارەت ناوخوەیی فیدراڵی کریا، لە شان شمارەیگ لە گەورە ئەفسەرەیل و سەرکردە سەربازییەیل و وەرپرسەیل دەزگا ئەمنییەیل و کەسایەتییەیل روشنهویری لە هەرێم کوردستان.
بەیاننامەگە هەمیش وت کە ئامادەبۊەیل باس لە رەوش ئەمنی لە "ناوچەیل جی گرنگی هاوبەش" لەناوەین هەردوگ لایەنەگە کردن، کە لیوا هاوبەشەیل پارێزگارییان کەن وە بەرزەوکردن پەرچەم ئاشتی، لەوڕەو دووپات لەبان بەرزەوکردن ئاست هاوکاری و هەماهەنگی وەگەرد ئەو لیوایەیلە کریا ئەرا مسۆگەرکردن تونکردن کۆنتڕۆڵ ئەمنی و پاراستن ئارامی لەو ناوچەیلە وە شیوەیگ خاستر و تونتر.
دیاری کرد کە دیدارەگە هەمیش رەسیە دۆسیەی ئاسایش سنوورەیل و پاراستنیان وە شیوەیگ هاوبەش لەلایەن پاسەوانەیل سنوور و هیزەیل پیشمەرگە، بیجگە لە باسکردن لە پلانەیل و بەرنامەیل مەشق و ئامادەکردن هاوبەش لەناوەین هەردوگ لایەنەگە.
