دوو ساڵ زيندانی وەبان عالیە نسەیف و 5 ساڵ ئەرا رائید جبووری
شەفەق نیوز- بەغداد
سەرچەوەیگ دادوەری، رووژ چوارشەممە، خەوەردا لە دەرچگن فەرمان زیندانیکردن ئەرا ماوەی دوو ساڵ لەبان عالیە نسەیف، وەپشتبەسین وە ئەو دانپیانانەیلە کە لەلی گیریاس لە پرس تومەتبار عەدنان جومەیلی.
سەرچەوەگە ئەرا ئاژانس شەفەق نیوز وت کە فەرمان زیندانیکردن ئەرا ماوەی 5 ساڵ لەبان رائید جبووری لە خود پرسەگە دەرچگ.
لەلای خوەیەو، دەسەی دەسپاکی راگەیان دەرچگن فەرمان زیندانیکردن تون لەبان عالیە نسەیف جاسم و رائید جبووری، لەبان بنەمای سوودگردنیان لە ئەرک گشتی، وە دەسنشانکردن ئەرا پابەندکردنیان وە گلەوداین بڕە پۊل سوودگردنەگە کە رەسێدە 10 ملیار دینار.
جی باسە کە هێزە ئەمنییەیل عراقی پارێزگار وەرین سەڵاحەدین، رائید ئیبراهیم جبووری، لە حوزەیران/ یۆنیۆی گوزەشتە دەسگیر کردن، دۊای ئەو دانپیانانەیلە کە عەدنان جومەیلی، بریکار وەزارەت نەفت عراقی دایەسەی.
دەسەی دەسپاکی فیدراڵی، لە ئەیلول/ سێپتەمبەر گوزەشتە، راگەیانۊد لە دەرچگن دوو فەرمان دادوەری لەبان پەرلەمانتار عالیە نوسەیف، یەکەم وە زیندانیکردن هەفت ساڵ لەبان تاوان قازانج نایاسایی، و دۊەم وە زیندانیکردن تون سێ ساڵ ئەرا شاردن زانیارییەیل لەناوی فۆڕم دەسپاکی دارایی، وەرد بڕیار دادگا ئەرا جیوەجیکردن سزای تونتر، و پابەندکردنی وە گلەوداین پۊلیگ کە باییەگەی رەد کەێد لە 61 ملیار دینار، بیجگە لە سزایگ دارایی کە هاوتا بوود وەرد بایی قازانج نایاسایی.
بانکی ناوەند عراقی، لە مانگ ئاب/ ئۆغۆستۆس گوزەشتە، بڕیارەیل دەسگردن وەبان پۊل 12 کەسایەتی سیاسی دیار دەرکردۊد، لە ناویان پەرلەمانتارەیل ئیسە و وەرین و راوێژکاریگ وەرین ئەرا سەرۆک وەزیرەیل، کە پەرلەمانتار عالیە نسەیف لە ناویانە، لەبان بنەمای باوەت پەیوەندیدار وە رۊوەرۊبۊن گەندەڵی.
