خوەیکوشتن گەنجیگ و خنکیان کەسیگ ترەک و مردن 3 کەس وە رویداو هاتوچو لە دوو پارێزگای عراقی
شەفەق نیوز/ سەرچەوەیگ ئەمنی لە پارێزگای دیالە، ئمڕوو دووشەممە، خەوەردا لە توومارکردن حالەتیگ خوەیکوشتن و نقومبوین دوو گەنج لە پارێزگاگە لە دوو رویداو جیاواز.
سەرچەوەگە وە ئاژانس شەفەق نیوز وت، "گەنجیگ لەداڵگبوی 2006 وە تەقەکردن لەخوەی خوەیکوشتیە لەناو ماڵیان لە ناحیەی کەنعان خوەرهەڵات بەعقوبە ناوەن پارێزگای دیالە".
سەرچەوەگە وتیش "دەوریەیل پۆلیس لە شوین رویداوەگە ئامادەبوین لێکۆڵینەوە لەلی وازکردن" وتیش "وەپای نیشانەیل سەرەتایی قوربانیەگە بیماری دەروینی داشتیە".
سەرچەوەگە وتیش "گەنجیگ ترەک لەداڵگبوی 2007 خەڵک ناوچەی قسەیرین خوەراوای پارێزگای دیالە گیان لەدەسداس لەوەخت سناوکردن لەناو ئاو دیجلە خنکیایە" وتیش "یە دویەم حالەت خنکیانە لە ئمڕوو تووماربکرێد لە پارێزگاگە، لە دویای رویداو خنکیانەگەی ئمڕوو شەفەق".
سەرچەوەیگ ئەمنی لە زیقاریش خەوەردا لە مردن 3 کەس و زەخمداری کەسیگ وە رویداو هاتوچوی لە پارێزگاگە.
سەرچەوەگە وە ئاژانس شەفەق نیوز وت، "رویداویگ هاتوچو لەبان ری گشتی ناوەین ناحیەی فەجر و قەزای قەلعە سوکەر رویدایە بویەسە مدوو پلیان ماشینیگ کە هووکارەگەی خێرایی زیای بویە".
ئاشکرایکرد، "لە ئەنجام رویداوەگە 3 کەس گیان لەدەسدان و یەکیگیش وە سەختی زەخمداربوی، ئەرا چارەسەرکردن کلکریاسە خەستەخانە".
