خوەی لەناو ماڵ داواکریاییگ لە داعش شاردۊدەو.. هۊردەکارییەیل دەسگیرکردن بکوش "عەمید هیشام" لە بەغداد
شەفەق نیوز - بەغداد
سەرۆک فەرمانگەی پەیوەندییەیل و راگەیانن لە وەزارەت ناوخۆ لیوا میقداد میری، ئمڕوو شەممە، خەوەر دا کە تەقەلایگ تەکنیکی و هەواڵگریی هۊرد کە لەلایەن شانەی هەڵۆیەیل هەواڵگری لە دیم رەسافە جیوەجی کریا، بۊە مدوو دیاریکردن شوین بکوش عەمید هیشام محمد و دەسگیرکردنی لەناو ماڵ کەسیگ کە خوەی لەناوی شاردۊدەو و پەنا بردۊد.
میری لە بەیاننامەیگ فەرمی وتیش، کە هۊردبۊن لە زانیاری و داتایەیل تایبەت وە خاوەن ماڵەگە ئاشکرا کرد کە ئەو وەپای بڕگەیل مادەی چوارەم لە یاسای دژەتیرۆر داواکریاگە ئەرا وەڕێوەبەرایەتی هەواڵگری و دژەتیرۆر لە نەینەوا وە مدوو لایەنگری ئەرا ریخریاگ داعش.
دیاری کرد کە دەسگیرکردن هەر دو داواکریایەگە جیوەجی کریا و رێکارەیل یاسایی بنەڕەتی لە وەرانوەریان گیریا وەردەس، و دەسوەدەسکردن هەریەکیگیان ئەرا لایەن داواکەر تایبەتمەن، و دووپات کرد کە دەزگا ئەمنییەیل وەردەوامن لە شوینکەفتن داواکریاگەیل و ری نەیان وە هیچ کەسیگ لە پەنادانیان یا شاردنیان.
یەیش هاوەخت وەگەرد ئەوەگ سەرۆک تیم شانەی راگەیانن ئەمنی، فەریق سەعد مەعن تیەێد، کە لە وەختیگ زۊتر لە شەوەکی شەممە خەوەر داۊد، وە دەسگیرکردن توومەتبار سەرەکی وە تەقەکردن لە "رۊداوەگەی دۆرە" لە بەغداد کە بۊە مدوو کوشیان ئەفسەریگ وە پلەی عەمید و کارمەنیگ ئەمنی.
پەنجشەممەی گوزەشتە، هیزیگ ئەمنی و مەفرەزەیل خزمەتگوزاری تۊش تەقەکردن راستەوخۆ هاتن مەوقەی جیوەجیکردن ئەرکیگ ئەرا لاوردن زیایچگەیل نیشتەجیبۊن لە دەورگرد دۆرە و کەرارە و گەڕەک دیجلە لە باشوور بەغداد.
پەلامارەگە بۊە مدوو کوشیان عەمید هیشام محەمەد تەڵاع، وەڕێوەبەر بەش پولیس ئەمانە لە دیم کەرخ، و کارمەن خالید عەباس لەفتە، و زامداربۊن چوار کەس ترەک، لەناویانیش کارمەنەیل ئەمنی و فەرمانبەریگ لە ئەمانەی بەغداد.
